ആ പേരല്ല: ഗ്യാലക്സി എസ്25 അള്‍ട്രാ-സ്ലിം ഫോണിന് മറ്റൊരു പേര് നൽകി കമ്പനി

സാംസങ് ഗ്യാലക്സി എസ്25 സിരീസ് സ്മാര്‍ട്ട്‌ഫോണുകള്‍ പുറത്തിറങ്ങിയപ്പോൾ ഏറ്റവും അധികം ആകാംക്ഷ സൃഷ്ടിച്ചത് ഫോണിന്റെ സ്ലിം മോഡലായിരുന്നു. ഗ്യാലക്സി സിരീസിലെ പതിവുപോലെ ഗ്യാലക്സി എസ്25, ഗ്യാലക്സി എസ്25 പ്ലസ്, ഗ്യാലക്സി എസ്25 അള്‍ട്ര എന്നീ മൂന്ന് ഫോണുകള്‍ക്ക് പുറമെ ഒരു അള്‍ട്രാ-തിന്‍ മോഡല്‍ കൂടി വരുമെന്നായിരുന്നു റിപ്പോര്‍ട്ടുകള്‍. ‘ഗ്യാലക്സി എസ്25 സ്ലിം’ എന്നായിരിക്കും ഈ ഫോണിന്‍റെ പേര് എന്നായിരുന്നു അഭ്യൂഹങ്ങള്‍.

എന്നാല്‍ ‘ഗ്യാലക്സി എസ്25 എഡ്ജ്’ എന്ന പേരിലുള്ള ഫോണ്‍ മോഡലാണ് സാംസങ് ഗ്യാലക്സി അണ്‍പാക്ഡ് 2025 ഇവന്‍റില്‍ അവതരിപ്പിച്ചത്. മുമ്പ് പറഞ്ഞുകേട്ടിരുന്ന അള്‍ട്ര-സ്ലിം മോഡലാണ് ഈ എഡ്ജ് ഫോണ്‍ എന്നാണ് വ്യക്തമാവുന്നത്. 6.4 മില്ലീമീറ്ററായിരിക്കും എസ്25 എഡ്‌ജ് ഫോണിന്‍റെ കട്ടി എന്നാണ് സൂചന. ക്യാമറ ബംബ് കൂടി ചേരുമ്പോള്‍ 8.3 എംഎം കട്ടി ഫോണിനുണ്ടാകും.

എന്നാല്‍ സാംസങ് അള്‍ട്രാ-തിന്‍ സ്മാര്‍ട്ട്ഫോണായ എസ്25 എഡ്‌ജ് ഗ്യാലക്സി എസ്25 സിരീസിനൊപ്പം വിപണിയില്‍ എത്തിച്ചിട്ടില്ല. മെയ് മാസമാകും ഗ്യാലക്സി എസ്25 എഡ്‌ജ് പുറത്തിറങ്ങുക എന്നാണ് റിപ്പോര്‍ട്ട്. ഗ്യാലക്സി എസ്25 എഡ്‌ജിന്‍റെ കൂടുതല്‍ വിവരങ്ങളും കമ്പനി ഇതുവരെ പുറത്തുവിട്ടിട്ടില്ല.