6,806 കോടി ലാഭം; മികച്ച നേട്ടവുമായി ഇൻഫോസിസ്

മുംബൈ: പ്രമുഖ ഐ.ടി. സേവനകമ്പനിയായ ഇന്‍ഫോസിസിന് മൂന്നാംപാദത്തില്‍ 6,806 കോടി രൂപയുടെ അറ്റാദായം. മുന്‍വര്‍ഷം ഇതേകാലത്തെ 6,106 കോടി രൂപയെക്കാള്‍ 11.4 ശതമാനമാണ് വര്‍ധന. സെപ്റ്റംബറില്‍ അവസാനിച്ച രണ്ടാംപാദത്തിലെ 6,506 കോടി രൂപയെക്കാള്‍ 4.6 ശതമാനം അധികമാണിത്.

മൂന്നാംപാദത്തില്‍ കമ്പനിയുടെ വരുമാനം 7.6 ശതമാനം ഉയര്‍ന്ന് 41,764 കോടി രൂപയിലെത്തി. മുന്‍വര്‍ഷമിത് 38,821 കോടി രൂപയായിരുന്നു.
സാമ്പത്തിക വര്‍ഷം ആദ്യ ഒന്‍പതുമാസക്കാലയളവില്‍ അറ്റാദായം 19,712 കോടി രൂപയാണ്. 7.8 ശതമാനമാണ് വര്‍ധന. ഇന്‍ഫോസിസിലെ ജീവനക്കാരുടെ എണ്ണത്തില്‍ വര്‍ധനയുണ്ടായിട്ടുണ്ട്. മൂന്നാംപാദത്തില്‍ ആകെ 3,23,379 ജീവനക്കാരാണ് കമ്പനിയിലുള്ളത്. 5,591 പേരുടെ വര്‍ധന.