ഇതാണ് സുലേഖ ചേച്ചിയുടെ ഡിലീറ്റായി പോയ സീന്‍; വീഡിയോ പങ്കുവെച്ച് ആസിഫ് അലി

ആസിഫ് അലിയുടെ രേഖാചിത്രം സിനിമ റിലീസ് ചെയ്തതിന് ശേഷം ഒരു വീഡിയോ സമൂഹമാദ്ധ്യമങ്ങളില്‍ ഏറെ വൈറലായിരുന്നു. ആസിഫ് അലി ജൂനിയര്‍ ആര്‍ട്ടിസ്റ്റായ സുലേഖയെ ആശ്വസിപ്പിക്കുന്നതായിരുന്നു വീഡിയോ. ചിത്രത്തില്‍ രണ്ട് ഷോട്ടുള്ള ഒരു സീനില്‍ സുലേഖ അഭിനയിച്ചിരുന്നെങ്കിലും എഡിറ്റിങ്ങിന്റെ സമയത്ത് ആ സീന്‍ ഒഴിവാക്കുകയായിരുന്നു.

ഇതോടെ ചിത്രം കാണാന്‍ ബന്ധുക്കള്‍ക്കും സുഹൃത്തുക്കള്‍ക്കുമൊപ്പമെത്തിയ സുലേഖ സങ്കടം താങ്ങാനാകാതെ കരഞ്ഞു. സിനിമ കണ്ടിറങ്ങിയ ആസിഫ് ഇത് കാണുകയും സുലേഖയെ ആശ്വസിപ്പിക്കുകയുമായിരുന്നു. ഇപ്പോഴിതാ ഒഴിവാക്കിയ ആ രംഗം പുറത്തുവിട്ടിരിക്കുകയാണ് ചിത്രത്തിന്റെ അണിയറപ്രവര്‍ത്തകര്‍.
സുലേഖ അഭിനയിച്ച രംഗം യൂട്യൂബിലൂടെ പുറത്തിറക്കിയതായി നടന്‍ ആസിഫ് അലി തന്നെ സാമൂഹിക മാധ്യമങ്ങളിലൂടെ അറിയിക്കുകയായിരുന്നു. ഇതാണ് സുലേഖ ചേച്ചിയുടെ ഡിലീറ്റായി പോയ സീന്‍. സിനിമ ഇറങ്ങിയ ദിവസം തന്നെ ഞങ്ങള്‍ ചേച്ചിയോട് പറഞ്ഞിരുന്നു ‘ഈ സീന്‍ ചേച്ചിക്ക് വേണ്ടി ഞങ്ങള്‍ പുറത്തിറക്കുമെന്ന് ‘ ആ വാക്ക് പാലിക്കുന്നു – ആസിഫ് അലി ഇന്‍സ്റ്റഗ്രാമില്‍ കുറിച്ചു.
23 സെക്കന്‍ഡ് ദൈര്‍ഘ്യമുള്ളതാണ് പുറത്തിറക്കിയ വീഡിയോ. വീഡിയോയ്ക്ക് താഴെ നിരവധിപേര്‍ അണിയറപ്രവര്‍ത്തകരെ അഭിനന്ദിച്ച് കമന്റിട്ടിട്ടുണ്ട്.

സുലേഖ രണ്ട് ഷോട്ടുകളും മനോഹരമായിട്ടാണ് ചെയ്തതെന്നും തന്റെ അടുത്ത ചിത്രത്തില്‍ സുലേഖയെ അഭിനയിപ്പിക്കുമെന്നും നേരത്തേ ആസിഫ് അലി പറഞ്ഞിരുന്നു. ജനുവരി ഒന്‍പതിനാണ് രേഖാചിത്രം തിയറ്ററുകളിലെത്തിയത്. മലയാളത്തില്‍ അപൂര്‍വ്വമായ ഓള്‍ട്ടര്‍നേറ്റ് ഹിസ്റ്ററി എന്ന സബ് ജോണറില്‍ എത്തിയ ചിത്രം ഒരു മിസ്റ്ററി ക്രൈം ഡ്രാമ കൂടിയാണ്.