ഇസഡ്- മോർ ടണൽ പ്രധാനമന്ത്രി ഇന്ന് രാജ്യത്തിന് സമർപ്പിക്കും

ശ്രീന​ഗർ: ഇസഡ്- മോർ ടണൽ പ്രധാനമന്ത്രി നരേന്ദ്രമോദി രാജ്യത്തിന് സമർപ്പിക്കുന്നതോടെ ലഡാക്കിൽ എല്ലാ കാലാവസ്ഥയിലും ഇന്ത്യൻ സൈന്യത്തിന് സാന്നിധ്യമുറപ്പിക്കാനാകും. ചൈനയുടേയും പാകിസ്ഥാന്റെയും ഭീഷണി നേരിടുന്ന തന്ത്രപരമായി പ്രാധാന്യമുള്ള ലഡാക്കിലെ സോനാമാർ​ഗിൽ ശൈത്യകാലത്ത് എത്തിപ്പെടുക അതീവ ദുഷ്കരമായിരുന്നു. ആ ഭീഷണിക്കാണ് സോനാമാർഗിനെ ശ്രീന​ഗറുമായി ബന്ധിപ്പിക്കുന്ന ഇസഡ്- മോർ ടണൽ തുറക്കുന്നതോടെ പരിഹാരമാകുന്നത്.

​ഗ​ഗൻ​ഗീറിനും മധ്യ കശ്മീരിലെ സോനാമാർഗിനും ഇടയിലാണ് ഇസഡ് മോർ ടണൽ നിർമിച്ചിരിക്കുന്നത്. 12 കിലോമീറ്റർ ദൈർഘ്യമുള്ളതാണ് ഈ തുരങ്കം. സമുദ്രനിരപ്പിൽ നിന്ന് 8,650 അടിയിലധികം ഉയരത്തിൽ സ്ഥിതി ചെയ്യുന്ന തുരങ്ക റോഡിന്റെ നിർമാണത്തിനായി 2,680 കോടി രൂപയാണ് കേന്ദ്രസർക്കാർ വിനിയോ​ഗിച്ചത്. പ്രധാന തുരങ്കത്തിന് 10.8 മീറ്റർ വീതിയുണ്ട്. അതിൽ 7.5 മീറ്റർ വീതിയുള്ള കുതിരലാട ആകൃതിയിലുള്ള എസ്‌കേപ്പ് ടണൽ ആണ് പ്രത്യേകത. 8.3 മീറ്റർ വീതിയുള്ള ഡി ആകൃതിയിലുള്ള വെന്റിലേഷൻ ടണലും ഇതിൽ ഉൾപ്പെടുന്നു. ഈ പ്രദേശത്തേക്കുള്ള Z- ആകൃതിയിലുള്ള റോഡിന്റെ പേരിലാണ് ഈ പദ്ധതി അറിയപ്പെടുന്നത്. Z-Morh എന്നാൽ ഇംഗ്ലീഷിൽ ‘Z-turn’ എന്നാണർത്ഥം. 2020 ജൂലൈയിൽ പദ്ധതി ആരംഭിച്ചത്.

ഹിമപാതം കാരണം ശൈത്യകാലത്ത് ഒറ്റപ്പെട്ടുകിടക്കുന്ന പ്രദേശമാണ് സോനാമാർ​ഗ്. പ്രതികൂല കാലാവസ്ഥയിലും സോനാമാർഗിലേക്ക് ​ഗതാ​ഗതമാണ് പദ്ധതിയുടെ പ്രധാന ലക്ഷ്യം. ചൈനയുടേയും പാകിസ്താന്റെയും ഭീഷണി നേരിടുന്ന തന്ത്രപരമായി പ്രാധാന്യമുള്ള ലഡാക്കിൽ എല്ലാ കാലാവസ്ഥയിലും ഇന്ത്യൻ സൈന്യത്തിന് കണക്റ്റിവിറ്റി നിലനിർത്താനുള്ള നിർണായക പദ്ധതിയാണിത്. ചൈനയുടെ ഭാഗത്ത് നിന്നും അപ്രതീക്ഷിത നീക്കമുണ്ടായാൽ സൈന്യത്തിന് ഇസഡ്-മോർ ടണൽ വഴി വളരെ വേഗത്തിൽ എത്താനാകും. അതിനാൽ ദേശീയ സുരക്ഷയ്‌ക്ക് അത്യന്താപേക്ഷിതമാണ് ഈ തുരങ്കം.

സോജില ടണൽ എന്ന ബൃഹത് പദ്ധതിയുടെ ഭാ​ഗമാണ് ഇസഡ് തുരങ്കം. 2028-ഓടെ സോജില ടണൽ ​ഗതാ​ഗത യോ​ഗ്യമാകുമെന്നാണ് പ്രതീക്ഷിക്കുന്നത്. സോജില ടണൽ പ്രവർത്തന ക്ഷമമായാൽ ശ്രീനഗറും ലേയും തമ്മിലുള്ള ദൂരം 49 കിലോമീറ്ററിൽ നിന്ന് 43 കിലോമീറ്ററായി കുറയും. കൂടാതെ യാത്രാ വേഗത മണിക്കൂറിൽ 30 കിലോമീറ്ററിൽ നിന്ന് 70 കിലോമീറ്ററായി വർദ്ധിക്കും.

പ്രധാനമന്ത്രിയാണ് ഇസഡ്- മോർ ടണൽ ഇന്ന് രാജ്യത്തിന് സമർപ്പിക്കുന്നത്. കേന്ദ്ര​ഗതാ​ഗത മന്ത്രി നിതിൻ ഗഡ്കരി, ലഫ്റ്റനൻ്റ് ഗവർണർ മനോജ് സിൻഹ, മുഖ്യമന്ത്രി ഒമർ അബ്ദുള്ള എന്നിവരും ഉദ്ഘാടന ചടങ്ങിൽ പങ്കെടുക്കും.