ഐ.പി.എൽ 18ാം സീസൺ: മാർച്ച് 23ന് തുടക്കമാകും

മുംബൈ: ഇന്ത്യൻ പ്രീമിയർ ലീഗ് (ഐ.പി.എൽ) ക്രിക്കറ്റ് 18ാം സീസണിന് മാർച്ച് 23ന് തുടക്കമാകും. ബി.സി.സി.ഐ വൈസ് പ്രസിഡന്‍റ് രാജീവ് ശുക്ലയാണ് ഇക്കാര്യം സ്ഥിരീകരിച്ചത്. മേയ് 25ന് കൊൽക്കത്ത ഈഡൻ ഗാർഡൻസിലാവും ഫൈനൽ മത്സരം നടക്കുക.

ബി.സി.സി.ഐയുടെ പ്രത്യേക ജനറൽ ബോഡി മീറ്റിങ്ങിനെത്തിയപ്പോഴാണ് രാജീവ് ശുക്ല മാധ്യമങ്ങളോട് ഐ.പി.എൽ സമയക്രമം വെളിപ്പെടുത്തിയത്.
ഐ.പി.എല്ലിലെ 10 ടീമുകളുടെയും താരലേലം പൂർത്തിയായിരുന്നു. നവംബർ 24, 25 തീയതികളിലെ ലേലത്തിലൂടെയാണ് ടീമുകൾ താരങ്ങളെ സ്വന്തമാക്കിയത്. 2024 മാർച്ച് 22നായിരുന്നു കഴിഞ്ഞ സീസൺ ആരംഭിച്ചത്. മേയ് 26ന് ചെന്നൈയിലായിരുന്നു ഫൈനൽ നടന്നത്. കൊൽക്കത്ത നൈറ്റ് റൈഡേഴ്സാണ് നിലവിലെ ഐ. പി.എൽ ചാമ്പ്യന്മാർ.