ക്ഷേത്രത്തിൽ ഷർട്ട് ധരിച്ച് കയറുന്നതുമായി ബന്ധപ്പെട്ട് മുഖ്യമന്ത്രി അഭിപ്രായം പറയേണ്ടെന്ന് യോഗക്ഷേമസഭ

തിരുവനന്തപുരം: ക്ഷേത്രങ്ങളിൽ പുരുഷന്മാർ മേൽവസ്ത്രം ധരിക്കാതെ കയറണമെന്നത് അനാചാരമാണെന്ന മുഖ്യമന്ത്രിയുടെ പ്രസ്താവനയിൽ വിവാദം കെട്ടടങ്ങുന്നില്ല. ക്ഷേത്രത്തിൽ ഷർട്ട് ധരിച്ച് കയറുന്നതുമായി ബന്ധപ്പെട്ട് മുഖ്യമന്ത്രി അഭിപ്രായം പറയേണ്ടെന്ന് യോഗക്ഷേമസഭ സംസ്ഥാന അധ്യക്ഷൻ അക്കീരമൺ കാളിദാസ ഭട്ടതിരിപ്പാട് പറഞ്ഞു. മുഖ്യമന്ത്രി പറഞ്ഞത് വ്യക്തിതാത്പര്യമാണെന്നും അദ്ദേഹം ആരോപിച്ചു.

ഓരോ ക്ഷേത്രത്തിലും ഓരോ രീതികൾ ഉണ്ടെന്നായിരുന്നു അക്കീരമൺ കാളിദാസ ഭട്ടതിരിപ്പാടിന്റെ പ്രതികരണം. അവിടുത്തെ ആചാര്യന്മാരാണ് ഷർട്ട് ധരിക്കണോ വേണ്ടയോ എന്ന് തീരുമാനിക്കേണ്ടതെന്നും അദ്ദേ​ഹം വ്യക്തമാക്കി. ഇക്കാര്യത്തിൽ എൻഎസ്എസ് ജനറൽ സെക്രട്ടറി പറഞ്ഞതാണ് ശരിയായ നിലപാടെന്നും അക്കീരമൺ കാളിദാസ ഭട്ടതിരിപ്പാട് പറഞ്ഞു.

സംഭവം രാഷ്ട്രീയമാക്കി ഹൈന്ദവ സമൂഹത്തിന്റെ മേൽ കുതിര കയറേണ്ടന്നും യോഗക്ഷേമസഭ സംസ്ഥാന അധ്യക്ഷൻ പറഞ്ഞു. മുഖ്യമന്ത്രി പറഞ്ഞത് വ്യക്തിതാൽപര്യമാണ്. ആചാര്യന്മാർ ഒരുമിച്ച് നിലപാട് എടുക്കേണ്ട വിഷയമാണിത്. ഇക്കാര്യത്തിൽ സർക്കാരല്ല തീരുമാനമെടുക്കേണ്ടതെന്നും കാളിദാസ ഭട്ടതിരിപ്പാട് ചൂണ്ടിക്കാട്ടി.