തിരൂരിലെ നോര്‍ക്ക-കേരളാബാങ്ക് വായ്‌പ്പാനിർണ്ണയ ക്യാമ്പില്‍ 4.99 കോടി യുടെ വായ്പകള്‍ക്ക് ശുപാർശ

പ്രവാസിസംരംഭകര്‍ക്കായി നോർക്ക റൂട്സും കേരളബാങ്കും സംയുക്തമായി മലപ്പുറം തിരൂരില്‍ സംഘടിപ്പിച്ച വായ്‌പ്പാനിർണയ ക്യാമ്പിൽ 4.99 കോടി രൂപയുടെ വായ്പകൾക്ക് ശുപാർശ നൽകി. 56 പ്രവാസി സംരംഭങ്ങൾക്കായാണ് ഈ തുക ലഭിക്കുക. നോര്‍ക്ക ഡിപ്പാര്‍ട്ട്മെന്റ് പ്രോജക്ട് ഫോര്‍ റിട്ടേണ്‍ഡ് എമിഗ്രന്‍സ് അഥവ എന്‍.ഡി.പി.ആര്‍.ഇ.എം പദ്ധതിപ്രകാരമാണ് വായ്പകള്‍ അനുവദിക്കുക. നടപടിക്രമങ്ങള്‍ പൂര്‍ത്തിയാക്കുന്നമുറയ്ക്ക് വായ്പ ലഭ്യമാക്കും.

താഴേപ്പാലം ചേമ്പര്‍ ഓഫ് കോമേഴ്സ് ബില്‍ഡിംഗില്‍ നടന്ന ചടങ്ങിൽ വളളിക്കുന്ന് എം.എല്‍.എ യും കേരളാബാങ്ക് ഡയറക്ടറുമായ അബ്ദുള്‍ ഹമീദ് മാസ്റ്റര്‍ വായ്പാ അനുമതി പത്രങ്ങൾ വിതരണം ചെയ്തു. ഉദ്ഘാടനച്ചടങ്ങിൽ നോര്‍ക്ക റൂട്ട്സ് കോഴിക്കോട് സെന്റര്‍ മാനേജര്‍ സി.രവീന്ദ്രന്‍ അധ്യക്ഷത വഹിച്ചു. കേരളാബാങ്ക് ഏരിയാ മാനേജര്‍ കെ.അബ്ദുളള, മാനേജര്‍ ടി.പി അബ്ദുള്‍ റസാഖ് എന്നിവർ പങ്കെടുത്തു. നോര്‍ക്ക റൂട്ട്സ് അസിസ്റ്റന്റ് മാനേജര്‍ ജെന്‍സി ജോസി എന്‍.ഡി.പി.ആര്‍.ഇ.എം പദ്ധതി വിശദീകരിച്ചു.

ഡിസംബര്‍ 19 ന് നിലമ്പൂരില്‍ നടന്ന വായ്‌പ്പാനിർണ്ണയ ക്യാമ്പില്‍ 7.26 കോടി യുടെ വായ്പകള്‍ക്ക് ശിപാര്‍ശ നല്‍കിയിരുന്നു.

പൊന്നാനിയിൽ ജനുവരി 06 ന് (ആര്‍.വി പാലസ് ഓഡിറ്റോറിയം, സി.വി ജംങ്ഷന്‍) കേരളാബാങ്കുമായി ചേര്‍ന്ന് വായ്‌പ്പാനിർണ്ണയ ക്യാമ്പ് സംഘടിപ്പിക്കുന്നുണ്ട്. താല്പര്യമുള്ള പ്രവാസികൾക്ക് www.norkaroots.org/ndprem എന്ന വെബ്‌സൈറ്റ് ലിങ്ക് മുഖേന NDPREM പദ്ധതിയിൽ രജിസ്റ്റർ ചെയ്തു പങ്കെടുക്കാവുന്നതാണ്.

സംശയങ്ങൾക്ക് നോർക്കറൂട്ട്സ് ഹെഡ്ഓഫീസ് തിരുവനന്തപുരം 0471 -2770511,7736917333 എന്നീ നമ്പറുകളില്‍ (ഓഫീസ് സമയത്ത് പ്രവൃത്തി ദിവസങ്ങളില്‍) ബന്ധപ്പെടാവുന്നതാണ്. അല്ലെങ്കില്‍ 24 മണിക്കൂറും പ്രവര്‍ത്തിക്കുന്ന നോര്‍ക്ക 1 ഗ്ലോബല്‍ കോണ്‍ടാക്ട് സെന്ററിന്റെ ടോള്‍ ഫ്രീ നമ്പറുകളായ 1800 425 3939 (ഇന്ത്യയില്‍ നിന്നും) +91-8802 012 345 (വിദേശത്തുനിന്നും, മിസ്സ്ഡ് കോള്‍ സര്‍വ്വീസ്) ബന്ധപ്പെടാവുന്നതാണ്.