പുതുവർഷാഘോഷം ദുരന്തമായി ; പടക്കം പൊട്ടിക്കുന്നതിനിടെ കൊക്കയില്‍ വീണ് യുവാവ് മരിച്ചു

മൂലമറ്റം : പുതുവത്സരാഘോഷത്തിന് പടക്കം പൊട്ടിക്കുന്നതിനിടെ കാൽവഴുതി കൊക്കയിൽ വീണ് യുവാവ് മരിച്ചു.കരിങ്കുന്നം മേക്കാട്ടിൽ പരേതനായ മാത്യുവിന്റെ മകൻ എബിൻ (26) ആണ് മരിച്ചത്. ചൊവ്വാഴ്ച രാത്രി 11.50ഓടെയാണ് സംഭവം.

കാഞ്ഞാർ വാഗമൺ റോഡിൽ പുത്തേടിനും കുമ്പങ്കാനത്തിനുമിടയിൽ ചാത്തൻപാറയിലാണ് സംഭവം.മൂന്നു കൂട്ടുകാരുമൊത്ത് വാഗമണ്ണിന് പോകാനിറങ്ങിയതായിരുന്നു എബിൻ. യാത്രയ്ക്കിടെ ചാത്തൻപാറയിൽ കാഴ്ച കാണാനിറങ്ങി. അതിനിടയിലാണ് ദുരന്തം.മൂലമറ്റത്തുനിന്നും അഗ്‌നിരക്ഷാ സേനയെത്തി എബിനെ രക്ഷപ്പെടുത്തി തൊടുപുഴയിൽ സ്വകാര്യാശുപത്രിയിൽ എത്തിച്ചു. ചികിൽസയിലിരിക്കെ ബുധനാഴ്ച എട്ടുമണിയോടെയാണ് മരണം. സംഭവത്തിൽ കാഞ്ഞാർ പോലീസ് നടപടി സ്വീകരിച്ചു.