കള്ളൻ റെയിൽവേയിൽ തന്നെ; കണ്ടെത്തിയത് 30 പവൻ സ്വർണ്ണമടക്കം നിരവധി വിലപിടിപ്പുള്ള വസ്തുക്കൾ

യാത്രക്കാരുടെ ബാഗുകൾ മോഷ്ടിക്കുന്ന റെയിൽവേ ജീവനക്കാരൻ പൊലീസ് പിടിയിൽ. മധുര റെയിൽവേ സ്റ്റേഷനിലാണ് സംഭവം. റെയിൽവേ മെക്കാനിക്ക് ജീവനക്കാരനയ സെന്തിൽ കുമാറാണ് പിടിയിലായത്. കഴിഞ്ഞ ആറ് വർഷമായി ഇയാൾ യാത്രക്കാരിൽ നിന്ന് ബാഗുകൾ മോഷ്ടിക്കുന്നുണ്ട്. ഇയാളുടെ മുറിയിൽ നിന്ന് കണ്ടെത്തിയത് ഇരുന്നൂറിലധികം ബാഗുകളാണ്. ഇയാൾ പലരിൽ നിന്ന് മോഷിടിച്ചതാണ് ഈ ബാഗുകൾ. കൂടതെ 30 പവൻ സ്വർണവും 30 ഫോണും 9 ലാപ്ടോപ്പും 2 ഐപാഡും പൊലീസ് കണ്ടെത്തി. മധുരൈ, കാരൂർ, വിരുദാചലം , ഈറോഡ് സ്റ്റേഷനുകളിൽ നിന്ന് ഇയാൾ മോഷണം നടത്തിയിട്ടുണ്ട്. പ്രതിയെ കുടുക്കിയത് സിസിടിവി ദൃശ്യങ്ങളാണ്.

ഡിസംബർ 28 ന് വെല്ലൂരിലെ മകൻ്റെ വീട്ടിൽ നിന്ന് മടങ്ങുമ്പോൾ മധുര റെയിൽവേ ജംഗ്ഷനിൽ വെച്ച് ഒരാൾ തൻ്റെ ബാഗ് മോഷ്ടിച്ചതായി ജെസു മേരി (75) മധുര ജിആർപിക്ക് നൽകിയ പരാതിയെ തുടർന്നാണ് സംഭവം പുറത്തറിയുന്നത്. റെയിൽ ഓവർ ബ്രിഡ്ജിൻ്റെ പടികൾ കയറാൻ പാടുപെടുന്നതിനിടയിൽ ഒരു മനുഷ്യൻ സഹായിക്കാൻ സന്നദ്ധത അറിയിച്ചിരുന്നുവെങ്കിലും പിന്നീട് ബാഗുമായി കടന്നു കളഞ്ഞെന്നാണ് ജെസുമേരി പറഞ്ഞത്. പരാതിയുടെ അടിസ്ഥാനത്തിൽ റെയിൽവേ പൊലീസ് സിസിടിവി ദൃശ്യങ്ങൾ പരിശോധിച്ചപ്പോൾ ബാഗുമായി സെന്തിൽ കുമാർ രക്ഷപ്പെടുന്നത് കണ്ടെത്തി. റെയിൽവേ പൊലീസ് സംഘം കേസ് അന്വേഷിച്ച് ഇറോഡ് റെയിൽവേ സ്റ്റേഷനിലെ മെക്കാനിക്കൽ വിഭാഗത്തിൽ എത്തുകയും ഹെൽപ്പറായ ആർ സെന്തിൽകുമാറിനെ തിരിച്ചറിയുകയും ചെയ്തു. എച്ച്എംഎസ് കോളനിയിലെ ഇയാളുടെ വീട്ടിലെത്തിയ പൊലീസ് സംഘം സെന്തിലിനെ പിടികൂടുകയായിരുന്നു. യാത്രക്കാരിൽ നിന്ന് മോഷ്ടിച്ച എല്ലാ ബാഗുകളും സുരക്ഷിതമാക്കാൻ വീടിനുള്ളിൽ പ്രത്യേക റാക്ക് നിർമ്മിച്ചതായും കണ്ടെത്തി.

ബാഗുകൾ പരിശോധിച്ചപ്പോൾ സ്വർണാഭരണങ്ങളും മൊബൈൽ ഫോണുകളും ലാപ്‌ടോപ്പുകളും മറ്റ് വിലപിടിപ്പുള്ള സാധനങ്ങളും ഉണ്ടായിരുന്നു. ഇയാൾ ഇറോഡിൽ താമസിച്ചിരുന്ന വീട്ടിലും സമാനമായ സംവിധാനമുണ്ടായിരുന്നു. മോഷ്ടിച്ച സാധനങ്ങളൊന്നും വിറ്റില്ലെങ്കിലും അവ ഉപയോഗിക്കുകയായിരുന്നു. ഐപാഡുകൾ, ചാർജറുകൾ, ഹെഡ്‌സെറ്റുകൾ, പാദരക്ഷകൾ എന്നിവയും ഇയാളുടെ രണ്ട് വീടുകളിൽ നിന്ന് പൊലീസ് കണ്ടെത്തിട്ടുണ്ട്.