മേയർക്കെതിരെ അവിശ്വാസപ്രമേയം കൊണ്ടുവന്നാൽ പിന്തുണയ്ക്കും ; കെ.മുരളീധരൻ

തൃശൂർ: വി.എസ് സുനിൽകുമാർ തൃശൂർ മേയർക്കെതിരെ നടത്തിയ വിമർശനത്തിൽ പ്രതികരണവുമായി കോൺഗ്രസ് നേതാവ് കെ. മുരളീധരൻ രംഗത്ത്. തെരഞ്ഞെടുപ്പ് കാലത്ത് മേയറുടെ കൂറെന്താണെന്ന് നമുക്ക് വ്യക്തമായതാണ്. മേയർക്കെതിരെ സിപിഐ അവിശ്വാസ പ്രമേയം കൊണ്ടുവന്നാൽ താൻ അതിനെ പിന്തുണക്കുമെന്നും മുരളീധരൻ പറഞ്ഞു. അതോടൊപ്പം തെരഞ്ഞെടുപ്പ് കാലത്ത് നഗരസഭയിലെത്തിയ സുരേഷ് ഗോപിയെ അടുത്ത് പിടിച്ചിരുത്തി പ്രഗത്ഭനായ പാർലമെന്റേറിയനെന്ന് പറഞ്ഞയാളാണ് തൃശൂർ മേയർ എം.കെ വർഗീസെന്നും കെ മുരളീധരൻ കുറ്റപ്പെടുത്തി.

സി.പി.ഐ നേതാവ് വി.എസ്.സുനിൽകുമാർ നേരത്തെ തൃശൂർ കോർപ്പറേഷൻ മേയർ എം.കെ വർഗീസിനെതിരെ ആഞ്ഞടിച്ച് രംഗത്തെത്തിയിരുന്നു. ബി.ജെ.പി സംസ്ഥാന അധ്യക്ഷൻ കെ.സുരേന്ദ്രൻ മേയറുടെ വസതിയിലെത്തി കേക്ക് നൽകിയതുമായി ബന്ധപ്പെട്ട വിവാദങ്ങൾക്കിടെയാണ് ഇപ്പോഴുള്ള പ്രതികരണം.