റീൽസിനെ ചൊല്ലി സ്‌കൂൾ വിദ്യാർഥികൾ തമ്മിൽ തർക്കം; ഒരു കുട്ടിക്ക് കുത്തേറ്റു, മൂന്ന് വിദ്യാർഥികൾ കസ്റ്റഡിയിൽ

കുറ്റനാട് (പാലക്കാട്): സ്‌കൂൾ വിദ്യാർഥികൾ തമ്മിലുള്ള സംഘർഷത്തിനിടെ ഒരു വിദ്യാർഥിക്ക് കത്തിക്കുത്തേറ്റു സംഭവത്തിൽ മൂന്ന് വിദ്യാർഥികളെ പൊലീസ് കസ്റ്റഡിയിലെടുത്തു. കൂറ്റനാട് മല റോഡിൽ തൃത്താല ഗവ. കോളജിന് സമീപത്തുവെച്ചാണ് സ്‌കൂൾ വിദ്യാർഥികൾ ഏറ്റുമുട്ടിയത്.ശനിയാഴ്ച‌ വൈകീട്ടാണ് സംഭവം.മേഴത്തൂർ, കുമരനെല്ലൂർ സ്‌കൂളുകളിലെ കുട്ടികൾ തമ്മിലായിരുന്നു സംഘർഷം. നേരത്തെ സോഷ്യൽ മീഡിയയിൽ പരസ്പ‌രം കളിയാക്കി റീൽസ് ഇട്ടതിനെ ചൊല്ലി ഇരുകുട്ടരും തമ്മിൽ കശപിശ നടന്നിരുന്നു. അതിലെ വിരോധം പരിഹരിക്കുന്നതിനായി നടന്ന ചർച്ചക്കിടെയാണ് വീണ്ടും സംഘർഷമുണ്ടായത്.സംഘർഷത്തിനിടെ ഒരു വിദ്യാർഥിയുടെ വയറ്റിൽ കത്തികൊണ്ട് കുത്തി പരിക്കേൽപ്പിക്കുകയായിരുന്നു. കുത്തേറ്റ സൗത്ത് തൃത്താല സ്വദേശി ബാസിതിനെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു.പ്രശ്നം പരിഹരിക്കാൻ വേണ്ടിയാണ് വിളിച്ചുവരുത്തിയതെന്നും കുമരനെല്ലൂരിലെ വിദ്യാർഥി കത്തികൊണ്ട് കുത്തി പരിക്കേൽപ്പിക്കുകയായിരുന്നുവെന്നുമാണ് പരിക്കേറ്റ വിദ്യാർഥി ചാലിശ്ശേരി പൊലീസിനോട് പറഞ്ഞത്, സ്പെഷ്യൽ ബ്രാഞ്ച് ഉദ്യോഗസ്ഥർ ഉൾപ്പെടെ സ്ഥലത്തെത്തി അന്വേഷണം ആരംഭിച്ചു. സംഭവത്തിൽ മൂന്ന് വിദ്യാർഥികളെ കസ്റ്റഡിയിലെടുത്തതായി സ്പെഷൽ ബ്രാഞ്ച് ഓഫിസർ അറിയിച്ചു.