കുടംപുളി കൊണ്ടുള്ള ​ഗുണങ്ങൾ..

കുടംപുളി ഇല്ലാതെ മലബാറുകാർക്ക് മീൻ കറിയില്ല. രുചിയും മണവും നൽകുന്നതിൽ പ്രധാനിയാണ് കുടംപുളി. ഉഷ്ണമേഖലാ പ്രദേശങ്ങളിലാണ് കുടംപുളി കൂടുതലായി കണ്ടുവരുന്നത്. ശരീരഭാരം കുറയ്കാകനുള്ള ഇതിന്റെ ​ഗുണത്തെ കുറിച്ച് ഭൂരിഭാ​ഗം പേർക്കും അറിയാവുന്നതാണ്. അടിവയറ്റിൽ അടിഞ്ഞ് കൂടിയ കൊഴുപ്പിനെ ഇല്ലാതാക്കാനും കുടംപുളിയോളം മറ്റൊന്നില്ല. ഇതിന് പുറമേ നിരവധി ​ഗുണങ്ങളാണ് കുടംപുളിക്കുള്ളത്.

ഊർജ്ജം വർദ്ധിപ്പിക്കാനും, വിഷാംശത്തെ പുറന്തള്ളാനും ഹൃദയസംബന്ധമായതും ദഹന സംബന്ധമായതുമായ ആരോഗ്യത്തെ പ്രോത്സാഹിപ്പിക്കാനും ഇവയ്‌ക്ക് പ്രത്യേക കഴിവുണ്ടെന്ന് പഠനങ്ങളിൽ തെളിഞ്ഞിട്ടുണ്ട്. അണുബാധയ്‌ക്കെതിരെയും പ്രതിരോധിക്കാനും ഇതിന് സാധിക്കും. മലബന്ധം പോലുള്ള ദഹന സംബന്ധമായ പ്രശ്നങ്ങൾക്കും കുടലിന്റെ ആരോ​ഗ്യത്തിനും നല്ലതാണ്. എല്ലുകളെ ബലപ്പെടുത്താനും ഹാപ്പി ഹോർമോണുകളെ പുറപ്പെടുവിക്കാനും കുടുംപുളിക്ക് കഴിയുമെന്ന് വിദ​ഗ്ധർ അഭിപ്രായപ്പെടുന്നു.

മോണയ്‌ക്ക് ബലം ലഭിക്കാനായി കുടംപുളി തിളപ്പിച്ചെടുത്ത വെള്ളം വായിൽ‌ കവിൾ കൊണ്ടാൽ മതി. ചുണ്ട്, കാലുകൾ എന്നിവ വിണ്ടുകീറുന്നത് തടയാൻ കുടംപുളി വിത്തിൽ നിന്നെടുക്കുന്ന തൈലം പുരട്ടാവുന്നതാണ്. ത്വക്ക് രോ​ഗങ്ങളിൽ കുടംപുളി വേര് അരച്ച് പുരട്ടാവുന്നതാണ്. പ്രമേഹ രോ​ഗികൾ നിയന്ത്രിത അളവിൽ കുടംപുളി കഴിക്കുന്നത് രക്തത്തിലെ പഞ്ചസാരയുടെ അളവ് കുറയ്‌ക്കാൻ സഹായിക്കും.