ഷൊർണൂർ റെയിൽവേ സ്റ്റേഷനിൽ മാവോയിസ്റ്റ് നേതാവ് പിടിയിൽ

പാലക്കാട്: ഷൊർണൂർ റെയിൽവേ സ്റ്റേഷനിൽ മാവോയിസ്റ്റ് നേതാവ് പിടിയിൽ. ശനിയാഴ്ച രാത്രി 11-ഓടെ സോമൻ എന്നയാളെ തീവ്രവാദവിരുദ്ധ സേന പിടികൂടി. വയനാട് നാടുകാണി ദളം കമാൻഡറാണ് ഇയാൾ.

കൊച്ചിയിൽ കഴിഞ്ഞദിവസം അറസ്റ്റിലായ മാവോയിസ്റ്റ് നേതാവ് മനോജിൽനിന്നാണ് സോമനെ കുറിച്ചുള്ള വിവരം ലഭിച്ചത്. എറണാകുളത്തേക്ക് കൊണ്ടുപോയ സോമനെ എ.ടി.എസ് ചോദ്യംചെയ്യുകയാണ്. മാവോവാദി പ്രവർത്തനത്തിന്റെ പേരിൽ വയനാട് ജില്ലാ പോലീസ് പുറത്തിറക്കിയ ’വാണ്ടഡ്’ പട്ടികയിലുൾപ്പെട്ട മനോജിന്റെ കൂട്ടാളിയാണ്.

കണ്ണൂർ, വയനാട് ജില്ലകളുൾപ്പെട്ട കബനിദളം കേന്ദ്രീകരിച്ച് പ്രവർത്തിക്കുന്ന മാവോവാദി സംഘടനയിൽ അംഗമാണ് മനോജെന്ന് എ.ടി.എസ്. കണ്ടെത്തിയിരുന്നു. മനോജ് അടങ്ങുന്ന 20 അംഗ സംഘത്തെക്കുറിച്ച് വിവരം നൽകുന്നവർക്ക് പാരിതോഷികവും പോലീസ് നേരത്തേ പ്രഖ്യാപിച്ചിരുന്നു.