വനിതാ ഡോക്ടറെയടക്കം ആക്രമിക്കാൻ ശ്രമിച്ച രണ്ട് പേർ പിടിയിൽ

തിരുവനന്തപുരം: ബാറിൽ ഉണ്ടായ സംഘർഷത്തിൽ പരിക്കേറ്റതിനെത്തുടർന്ന് ആശുപത്രിയിലെത്തിച്ച പ്രതികൾ അവിടെ വെച്ചും അക്രമാസക്തരായി. ലഹരി ഉപയോഗിച്ചിരുന്ന പ്രതികൾ സാമൂഹിക ആരോഗ്യ കേന്ദ്രത്തിലെ വനിതാ ഡോക്ടറെയും ജീവനക്കാരെയും ആക്രമിക്കാനും ശ്രമിച്ചു. സംഭവത്തിൽ രണ്ട് യുവാക്കളെ പോലീസ് അറസ്റ്റ് ചെയ്തു. തലയ്ക്ക് പരിക്കേറ്റ് മുറിവുമായാണ് ഇവർ ആശുപത്രിയിൽ എത്തിയത്. കാട്ടുംപുറം സ്വദേശി അഖിലും മുണ്ടോണിക്കര സ്വദേശി ശ്യാം നായരുമാണ് സംഭവത്തിൽ പിടിയിലായത്. ഇന്നലെ രാത്രി 11.30 ഓടെയായിരുന്നു സംഭവം.

വിവരമറിഞ്ഞ് ആശുപത്രിയിലെത്തിയ പോലീസുകാരെയും ഇവർ ആക്രമിക്കാൻ ശ്രമിച്ചു. പാങ്ങോട് പൊലീസാണ് ഇവരെ പിടികൂടിയത്. ഡ്യൂട്ടിയിലുണ്ടായിരുന്ന വനിതാ ഡോക്ടറെയും മറ്റു ജീവനക്കാരെയും ഇരുവരും ആക്രമിക്കാൻ ശ്രമിക്കുകയായിരുന്നു. കൂടാതെ ആശുപത്രി ഉപകരണങ്ങള്‍ നശിപ്പിക്കുകയും കത്രിക കൊണ്ട് പരിക്കേൽപ്പിക്കാൻ ശ്രമിക്കുകയും ചെയ്തെന്ന് ജീവനക്കാര്‍ പോലീസിനോട് പറഞ്ഞു.