ഒരു വര്‍ഷത്തെ കാലാവധി; പുതിയ പ്ലാനുമായി ബിഎസ്എൻഎൽ

തിരുവനന്തപുരം: ബിഎസ്എന്‍എല്‍ ഉപയോക്താക്കൾ ഉന്നയിക്കുന്ന വാലിഡിറ്റി പ്രശ്നം പരിഹരിക്കുന്നതിന്റെ ഭാഗമായി ഒരു വര്‍ഷത്തെ കാലാവധി നല്‍കുന്ന റീച്ചാര്‍ജ് പ്ലാനുകള്‍ അവതരിപ്പിച്ച് കമ്പനി. ബിഎസ്എന്‍എല്ലിന്‍റെ 1999 രൂപ റീച്ചാര്‍ജാണ് 365 ദിവസത്തെ വാലിഡിറ്റിയോടെ വരുന്ന ഒരു പാക്കേജ്.

ബിഎസ്എന്‍എല്ലിന്‍റെ 1999 രൂപ റീച്ചാര്‍ജ് പ്ലാനിന് വാലിഡിറ്റി 365 ദിവസമാണ്. അതായത് ഒരു വര്‍ഷം ഈ പ്ലാനിന്‍റെ ആനുകൂല്യങ്ങള്‍ ഉപയോക്താക്കള്‍ക്ക് നേടാം. ബിഎസ്എന്‍എല്ലിന്‍റെ മറ്റ് മെഗാ പ്ലാനുകള്‍ പോലെ 1999 രൂപ റീച്ചാര്‍ജിലും വോയിസ് കോളിംഗ് സൗജന്യമാണ്. 365 ദിവസത്തേക്ക് ആകെ 600 ജിബി ഡാറ്റ ഉപയോഗിക്കാം. എന്നാൽ ഈ പരിധി കഴിഞ്ഞാല്‍ ഡാറ്റാ വേഗം 40 കെബിപിഎസ് ആയി കുറയും. ഇതിന് പുറമെ ദിവസവും 100 വീതം സൗജന്യ എസ്എംഎസുകളും ഉപയോക്താക്കള്‍ക്ക് ആസ്വദിക്കാൻ കഴിയും.

അതേസമയം, 365 ദിവസം വാലിഡിറ്റിയില്‍ 2999 രൂപയുടെ ഒരു റീച്ചാര്‍ജ് പ്ലാന്‍ കൂടി ബിഎസ്എന്‍എല്ലിനുണ്ട്. എന്നാല്‍ ദിവസവും മൂന്ന് ജിബി ഡാറ്റ ഈ പ്ലാനിനൊപ്പം കിട്ടും എന്നതാണ് പ്രത്യേകത. കുറഞ്ഞ നിരക്കില്‍ ഒട്ടേറെ സര്‍വീസ് ആനുകൂല്യങ്ങള്‍ നല്‍കുന്ന ടെലികോം ഓപ്പറേറ്റര്‍മാരാണ് ബിഎസ്എന്‍എല്‍. സമീപകാലത്ത് 4ജി വിന്യാസവും നടക്കുന്നതിനാല്‍ മെച്ചപ്പെട്ട സേവനം നല്‍കുന്നു എന്നാണ് ബിഎസ്എന്‍എല്ലിന്‍റെ അവകാശവാദം.