ഇന്ത്യൻ വിപണിയിൽ താങ്ങാനാവുന്ന ഹൈബ്രിഡ് കാറുകളുമായി മാരുതി സുസുക്കി

രാജ്യത്തെ ജനപ്രിയ വാഹന ബ്രാൻഡായ മാരുതി സുസുക്കിക്ക് നിലവിൽ രണ്ട് ശക്തമായ ഹൈബ്രിഡ് വാഹനങ്ങളുണ്ട്. ഗ്രാൻഡ് വിറ്റാരയും ഇൻവിക്ടോയും. ഈ രണ്ട് മോഡലുകളും ടൊയോട്ടയുടെ സെൽഫ് ചാർജിംഗ് ഹൈബ്രിഡ് സാങ്കേതികവിദ്യയാണ് ഉപയോഗിക്കുന്നത്. ഇപ്പോഴിതാ ബഹുജന വിപണിയിലേക്ക് ഹൈബ്രിഡ് സാങ്കേതികവിദ്യ കൂടുതൽ പ്രാപ്യമാക്കാൻ ലക്ഷ്യമിട്ട്, മാരുതി സുസുക്കിയുടെ മാതൃ കമ്പനിയായ സുസുക്കി മോട്ടോർ കോർപ്പറേഷൻ ഇന്ത്യൻ വിപണിയിൽ താങ്ങാനാവുന്ന ഒരു ഹൈബ്രിഡ് മോഡൽ വികസിപ്പിക്കുന്നതായാണ് പുതിയ റിപ്പോര്‍ട്ടുകൾ.

ഫ്രോങ്ക്സ് കോംപാക്ട് ക്രോസ്ഓവർ, ബലേനോ ഹാച്ച്ബാക്ക്, പുതിയ മിനി എംപിവി, സ്വിഫ്റ്റ് ഹാച്ച്ബാക്ക് എന്നിവയുൾപ്പെടെ ചെറിയ കാറുകളിൽ സ്വന്തം ചെലവ് കുറഞ്ഞ ഹൈബ്രിഡ് സാങ്കേതികവിദ്യ അവതരിപ്പിക്കാൻ വാഹന നിർമ്മാതാവ് പദ്ധതിയിടുന്നു. ഈ സംരംഭം ഒടുവിൽ വാഹനങ്ങളുടെ ഇന്ധനക്ഷമത മെച്ചപ്പെടുത്തുകയും അവയുടെ കാർബൺ പുറന്തള്ളൽ കുറയ്ക്കുകയും ചെയ്യും.

2025-ൽ ബ്രാൻഡിൻ്റെ പുതിയ ഹൈബ്രിഡ് സിസ്റ്റം (HEV) അവതരിപ്പിക്കുന്ന ആദ്യ മോഡലായിരിക്കും മാരുതി സുസുക്കി ഫ്രോങ്ക്സ് ഫെയ്‌സ്‌ലിഫ്റ്റ്. പുതിയ തലമുറ ബലെനോയും ജപ്പാൻ-സ്പെക്ക് സ്‌പേഷ്യയെ അടിസ്ഥാനമാക്കിയുള്ള ഒരു മിനി എംപിവിയും 2026-ൽ വരും. പുതിയ സ്വിഫ്റ്റും ഹൈബ്രിഡ് സാങ്കേതികവിദ്യയുള്ള അടുത്ത തലമുറ ബ്രെസയും യഥാക്രമം 2027-ലും 2029-ലും പുറത്തിറക്കും.

ഹൈബ്രിഡ് ഇലക്ട്രിക് വാഹനങ്ങളുമായി 25 ശതമാനവും ബാറ്ററി ഇലക്ട്രിക് വാഹനങ്ങൾ (ബിഇവി) ഉപയോഗിച്ച് 15 ശതമാനവും വിൽപ്പന വിഹിതം കൈവരിക്കാനാണ് മാരുതി സുസുക്കി ലക്ഷ്യമിടുന്നത്. എന്നിരുന്നാലും, പ്രധാന വിൽപ്പന സംഭാവന (60%) ആന്തരിക ജ്വലന എഞ്ചിൻ (ഐസിഇ)-പവർ വാഹനങ്ങൾ, കൂടാതെ സിഎൻജി, ബയോഗ്യാസ്, ഫ്ലെക്സ്-ഇന്ധനം, എത്തനോൾ, ബ്ലെൻഡഡ്-ഇന്ധന മോഡലുകൾ എന്നിവയിൽ നിന്നാണ് പ്രതീക്ഷിക്കുന്നത്. നിലവിൽ പ്ലഗ് ഇൻ ഹൈബ്രിഡ് വാഹനങ്ങൾ ഇന്ത്യൻ വിപണിയിൽ അവതരിപ്പിക്കാൻ കമ്പനിക്ക് പദ്ധതിയില്ല.
അതേസമയംമാരുതി സുസുക്കി ഈ സാമ്പത്തിക വർഷത്തിൽ അതിൻ്റെ ആദ്യത്തെ ഇലക്ട്രിക് വാഹനത്തിൻ്റെ ഉത്പാദനം ആരംഭിക്കും. യൂറോപ്പിലേക്കുള്ള കയറ്റുമതി 2025-26 സാമ്പത്തിക വർഷത്തിൽ ആരംഭിക്കാൻ സാധ്യതയുണ്ട്. കഴിഞ്ഞ വർഷത്തെ ഓട്ടോ എക്‌സ്‌പോയിൽ പ്രദർശിപ്പിച്ച മാരുതി സുസുക്കി ഇവിഎക്‌സ് കൺസെപ്റ്റിൻ്റെ പ്രൊഡക്ഷൻ റെഡി പതിപ്പായിരിക്കും ഇത്. ഇന്ത്യയിൽ, ഈ ഇലക്ട്രിക് വാഹനം എംജി ഇസെഡ്എസ് ഇവി, വരാനിരിക്കുന്ന ഹ്യുണ്ടായ് ക്രെറ്റ ഇവി , ടാറ്റ കർവ്വ് ഇവി എന്നിവയുമായി മത്സരിക്കും.