‘തെരഞ്ഞെടുപ്പിന് മുമ്പ് ഇതാണ് അവസ്ഥയെങ്കിൽ അധികാരം കിട്ടിയാൽ എന്താകും’; ഇന്ത്യ മുന്നണിക്കെതിരെ ബിജെപി

ഡൽഹി: ഇന്ത്യ മുന്നണിയുടെ ജാർഖണ്ഡിലെ റാലിയിൽ തമ്മിലടി ഉണ്ടായ സാഹചര്യത്തിൽ മുന്നണിക്കെതിരെ രൂക്ഷ വിമർശനവുമായി ബിജെപി. തെരഞ്ഞെടുപ്പിന് മുമ്പ് ഇതാണ് സ്ഥിതിയെങ്കിൽ അധികാരം കിട്ടിയാൽ എന്താകും അവസ്ഥയെന്നാണ് ബിജെപിയുടെപരിഹാസം. തലതല്ലി പൊളിക്കുന്നവർക്കായി വോട്ട് പാഴാക്കരുതെന്നും ബിജെപി ദേശീയ വക്താവ് ഷഹ്സാദ് പൂനെവാല.

എന്നാൽ ഇതിനെതിരെയൊന്നും പ്രതികരിക്കാതെ തുടരുകയാണ് ഇന്ത്യ മുന്നണി. തമ്മിലടിച്ച ചത്രയിലെ നേതാക്കൾക്കെതിരെ നടപടിയുണ്ടായേക്കുമെന്ന് സൂചനയുണ്ട്. ജാർഖണ്ഡിലെ ചത്ര സീറ്റിൻറെ വിഭജനത്തെ ചൊല്ലി കോൺഗ്രസ്- ആർജെഡി പ്രവർത്തകരാണ് ഞായറാഴ്ച നടന്ന ഇന്ത്യ മുന്നണി റാലിയിൽ തമ്മിലടിച്ചത്.

ലോക്സഭ തെരഞ്ഞെടുപ്പ് വോട്ടിംഗ് ഇതിനോടകം തന്നെ രാജ്യത്ത് തുടങ്ങിക്കഴിഞ്ഞു. ഒന്നാം ഘട്ട വോട്ടെടുപ്പിൽ വോട്ടിംഗ് ശതമാനം കുറഞ്ഞത് ബിജെപി പാളയത്തിൽ ആശങ്ക സൃഷ്ടിക്കുന്നുവെന്ന റിപ്പോർട്ടുകൾ പുറത്തുവരുന്നതിനിടെയാണ് പ്രതിപക്ഷ സഖ്യത്തിൻറെ പൊരുത്തക്കേടുകൾ മുൻനിർത്തി ബിജെപി രാഷ്ട്രീയപ്പോര് മുറുക്കുന്നത്.