ആക്രി സാധനങ്ങൾ സൂക്ഷിച്ച ഗോഡൗണില്‍ വന്‍ തീപിടിത്തം

കോഴിക്കോട്: ആക്രി സാധനങ്ങൾ സൂക്ഷിച്ച ഗോഡൗണില്‍ വന്‍ തീപിടിത്തം. കോഴിക്കോട് മാങ്കാവിന് സമീപം കുളങ്ങര പീടികയിലെ ഇക്കോ പേപ്പര്‍സ് ആന്‍ഡ് സ്‌ക്രാപ്പ്‌സ് എന്ന സ്ഥാപനത്തിലാണ് തീപിടുത്തം ഉണ്ടായത്.

പുലര്‍ച്ചെ 1.30ഓടെ കടയുടെ പരിസരത്ത് ഉണ്ടായിരുന്നവരാണ് അപകടം കണ്ടത്.പരിസരവാസികള്‍ ചേര്‍ന്ന് തീ അണക്കാന്‍ പരിശ്രമിച്ചെങ്കിലും ആളിക്കത്തുകയായിരുന്നു.മീഞ്ചന്ത അഗ്നിരക്ഷാ നിലയത്തില്‍ നിന്ന് മൂന്ന് യൂണിറ്റുകള്‍ നാല് മണിക്കൂറിലേറെ നീണ്ട പരിശ്രമത്തിനൊടുവിലാണ് തീ നിയന്ത്രണ വിധേയമാക്കിയത്.

തീപിടിത്തമുണ്ടായ ഭാഗത്തെ ഷെഡിനോട് ചേര്‍ന്ന് തന്നെ മൂന്ന് വീടുകള്‍ ഉണ്ടായിരുന്നു. ഈ വീട്ടുകാരെ ആദ്യം മാറ്റിയ ശേഷം വീടുകളോട് ചേര്‍ന്ന ഭാഗത്തെ തീ ആദ്യം നിയന്ത്രണ വിധേയമാക്കിയാണ് മറ്റ് ഭാഗങ്ങളിലെ തീ അണച്ചത്. 10 ലക്ഷത്തിലേറെ രൂപയുടെ നഷ്ടമാണ് പ്രാഥമികമായി കണക്ക്.