സോഷ്യൽമീഡിയ താരമായ യുവതിക്ക് ദാരുണാന്ത്യം

മെക്സിക്കോ സിറ്റി: സോഷ്യൽമീഡിയ താരമായ യുവതി വെടിയേറ്റ് മരിച്ചു. മെക്സിക്കോ സ്വദേശിനി വലേറിയ മാർക്കേസ് (23) ആണ് കൊല്ലപ്പെട്ടത്. ലൈവ്സ്ട്രീമിങ്ങിനിടെയാണ് അക്രമിയെത്തി യുവതിയെ വെടിവെച്ചത്. ബ്യൂട്ടി, മേക്കപ്പ് വിഡിയോകളുമായി ടിക്ടോക്കിൽ സജീവമായിരുന്നു മരിച്ച വലേറിയ മാർക്കേസ്.

ഇൻസ്റ്റഗ്രാമിലും ടിക്ടോക്കിലുമായി രണ്ടു ലക്ഷത്തോളം ഫോളോവേഴ്സുള്ള താരമാണ് വലേറിയ. ജെലിസ്കോയിലുള്ള ബ്യൂട്ടി സലൂണിൽ ചൊവ്വാഴ്ച ലൈവ്സ്ട്രീമിങ് നടത്തുമ്പോഴാണ് യുവതി കൊല്ലപ്പെട്ടത്. ബൈക്കിലെത്തിയ അക്രമി യുവതിക്കുനേരേ വെടിയുതിർക്കുകയായിരുന്നു. സമ്മാനപ്പൊതി കൈമാറാനെന്ന വ്യാജേനയാണ് ഇയാൾ എത്തിയത്.

തലയിലും നെഞ്ചിലും വെടിയേറ്റ് വലേറിയ കസേരയിൽനിന്നു വീണപ്പോഴേക്കും ഫോൺ ഒരാൾ കൈക്കലാക്കി ലൈവ്സ്ട്രീമിങ് നിർത്തി. സ്ത്രീകൾക്കെതിരെയുള്ള അതിക്രമങ്ങളുടെ ഉയർന്ന നിരക്കുള്ള രാജ്യമാണ് മെക്സിക്കോ.