വെടിനിര്‍ത്തല്‍ പ്രഖ്യാപനത്തിന് ശേഷവും വിമാന സർവീസുകൾ നിർത്തിയത് നീട്ടി ഖത്തർ എയർവേയ്‌സ്

ദോഹ: ഇന്ത്യ – പാകിസ്ഥാന്‍ സംഘര്‍ഷത്തില്‍ വെടിനിര്‍ത്തല്‍ പ്രഖ്യാപിച്ചെങ്കിലും, ഇരുരാജ്യങ്ങളിലേയും നിശ്ചിത എയര്‍പോര്‍ട്ടുകളിലേക്ക് ഖത്തര്‍ എയര്‍വേസ് വിമാന സര്‍വീസുകള്‍ നിര്‍ത്തിവെച്ചത് തുടരും. മെയ് 10, 11, 12 തീയതികളില്‍ ദോഹയില്‍ നിന്ന് ഇന്ത്യയിലെ അമൃത്സര്‍ (ATQ), പാകിസ്ഥാനിലെ കറാച്ചി (KHI), ലാഹോര്‍ (LHE), ഇസ്ലാമാബാദ് (ISB), മുള്‍ട്ടാന്‍ (MUX), പെഷവാര്‍ (PEW), സിയാല്‍കോട്ട് (SKT) എന്നിവിടങ്ങളിലേക്കുള്ള വിമാന സര്‍വീസുകള്‍ ആണ് നിര്‍ത്തിവച്ചത്. എയര്‍ലൈന്‍ ഔദ്യോഗിക സോഷ്യല്‍ മീഡിയ പ്ലാറ്റ്‌ഫോമുകളിലൂടെയാണ് ഇക്കാര്യം അറിയിച്ചത്.

ഇന്ത്യയുടെ വടക്കന്‍, പടിഞ്ഞാറന്‍ മേഖലകളിലെ 32 വിമാനത്താവളങ്ങള്‍ മെയ് 15 ന് പുലര്‍ച്ചെ 5:29 വരെ അടച്ചിടുമെന്ന് ഇന്ത്യയുടെ വിമാനത്താവള അതോറിറ്റി പ്രഖ്യാപിച്ചു. 2025 മെയ് 11 ഞായറാഴ്ച ഉച്ചയ്ക്ക് 12 മണി വരെ വ്യോമാതിര്‍ത്തി പൂര്‍ണമായും അടച്ചിടുമെന്ന് പാകിസ്ഥാന്‍ വ്യോമയാന അതോറിറ്റി അറിയിച്ചിരുന്നു. അതേസമയം, യാത്രക്കാരുടെ സുരക്ഷയാണ് തങ്ങളുടെ പ്രധാന മുന്‍ഗണനയെന്ന് ഖത്തര്‍ എയര്‍വേസ് വ്യക്തമാക്കി.