അഭിനയിക്കുന്നത് അമ്മയുടെ ഇഷ്ട്ടമാണ്, എനിക്കതിൽ പ്രശ്നമില്ല’; സുധിയുടെ മകൻ

ഇപ്പോൾ സോഷ്യൽ മീഡിയയിൽ നിരന്തരം വിമർശനങ്ങൾ നേരിടുകയാണ് അന്തരിച്ച കലാകാരൻ കൊല്ലം സുധിയുടെ ഭാര്യ രേണു. സുധിയുടെ മരണ ശേഷം റീലുകളിലൂടെയും ഷോർട് ഫിലിമുകളിലൂടെയും ആൽബങ്ങളിലൂടെയുമെല്ലാം സജീവമാണ് രേണു.

ഇതിനിടെ, സുധിയുടെ ആദ്യ വിവാഹത്തിലെ മകനായ കിച്ചുവിനെ പുറത്താക്കി എന്ന തരത്തിലെല്ലാം രേണുവിനെതിരെ വിമർശനങ്ങൾ വന്നിരുന്നു. എന്നാൽ ഇളയ മകൻ റിതുക്കുട്ടനെക്കാൾ അൽപം സ്നേഹം കൂടുതൽ കിച്ചുവിനോടാണെന്നും തന്നെ ആദ്യം അമ്മ എന്നു വിളിച്ചത് കിച്ചുവാണെന്നും രേണു വ്യക്തമാക്കിയിരുന്നു. ഇപ്പോഴിതാ കിച്ചു നൽകിയ അഭിമുഖമാണ് ശ്രദ്ധനേടുന്നത്

‘തന്റെ കാര്യങ്ങളെല്ലാം അമ്മ നന്നായി നോക്കാറുണ്ട്. പഠനാവശ്യങ്ങൾക്കും മറ്റു കാര്യങ്ങൾ‌ക്കുമെല്ലാമുള്ള പണം അമ്മ തന്നെയാണ് തരുന്നത്. റിതുക്കുട്ടൻ ഇടക്ക് വീഡിയോ കോൾ ചെയ്യും. ചേട്ടൻ‌ വീട്ടിലേക്കു വാ എന്നൊക്കെ പറയും. അവനെ കാണണം എന്നു തോന്നുമ്പോൾ ഞാൻ വീട്ടിലേക്കു പോകും. എനിക്കവിടെ സ്വന്തമായി ഒരു മുറിയുണ്ട്. വീട്ടിലെത്തിയാൽ കൂടുതൽ സമയവും ആ മുറിക്കകത്തു തന്നെയായിരിക്കും’, കിച്ചു പറഞ്ഞു.

കൂടാതെ രേണു അഭിനയിക്കുന്നതിനെ കുറിച്ചും കിച്ചു പറഞ്ഞു. ‘അമ്മ അഭിനയിക്കുന്നത് അമ്മയുടെ ഇഷ്ടമാണ്. തനിക്കതിൽ പ്രശ്നമൊന്നും ഇല്ല. സോഷ്യൽ മീഡിയിൽ വരുന്ന നെഗറ്റീവ് കമന്റുകൾ താൻ ശ്രദ്ധിക്കാറില്ല. വീണ്ടുമൊരു വിവാഹം കഴിക്കണോ എന്നതും അമ്മയുടെ ഇഷ്ട്ടമാണ്. അമ്മയ്ക്ക് അമ്മയുടേതായ ജീവിതമുണ്ടെന്നും അതിൽ തനിക്ക് പ്രത്യേകിച്ചൊരു അഭിപ്രായവുമില്ല’, കിച്ചു പറഞ്ഞു.