ഏത് വെല്ലുവിളിയും ഏറ്റെടുക്കാൻ തയ്യാറായ കളിക്കാരൻ: ശ്രേയസിനെക്കുറിച്ച് സുനിൽ ജോഷി

കൊൽക്കത്ത: കെകെആർ ക്യാപ്റ്റൻ ശ്രേയസ് അയ്യരുടെ പേസ് ബൗളിംഗിനെതിരായ സമീപകാല പ്രകടനത്തെ പ്രശംസിച്ച് പഞ്ചാബ് കിംഗ്‌സിന്റെ സ്പിൻ ബൗളിംഗ് പരിശീലകൻ സുനിൽ ജോഷി. 2024 ലെ ഐപിഎൽ കിരീടം നേടിയ ശേഷം ആദ്യമായി ഈഡൻ ഗാർഡൻസിൽ കളിക്കാനെത്തുന്ന ശ്രേയസിനെക്കുറിച്ചും ടീമിന്റെ തന്ത്രങ്ങളെക്കുറിച്ചും ജോഷി മാധ്യമങ്ങളോട് സംസാരിച്ചു.

‘കഴിഞ്ഞ 8-10 മാസങ്ങളിലെ ശ്രേയസിന്റെ പ്രകടനം പരിശോധിച്ചാൽ, അദ്ദേഹം പേസ് ബൗളിംഗിനെതിരെ മാത്രമല്ല, സ്പിന്നിനെതിരെയും കൂടുതൽ സ്ഥിരതയോടെ കളിക്കുന്നുണ്ട്. ഏത് വെല്ലുവിളിയും ഏറ്റെടുക്കാൻ തയ്യാറായ ഒരു കളിക്കാരനാണ് അദ്ദേഹം. അദ്ദേഹം കഠിനാധ്വാനം ചെയ്യുന്നുണ്ട്. അതിന്റെ ഫലമാണ് ഇപ്പോൾ കാണുന്നത്. ഇത് ടീമിന് നല്ല വാർത്തയാണ്. ഒരു നേതാവെന്ന നിലയിൽ മുന്നോട്ട് പോകാൻ അദ്ദേഹത്തിന് കൂടുതൽ പ്രചോദനം നൽകും’-ജോഷി അഭിപ്രായപ്പെട്ടു.

ന്യൂ ചണ്ഡീഗഡിൽ നടന്ന ആദ്യ മത്സരത്തിൽ കൊൽക്കത്തയ്ക്കെതിരെ നാല് വിക്കറ്റ് നേടിയ യുസ്‌വേന്ദ്ര ചാഹലിന്റെ പ്രകടനത്തെ ജോഷി പ്രത്യേകം പരാമർശിച്ചു. “യൂസി ഐപിഎൽ ചരിത്രത്തിലെ ഏറ്റവും കൂടുതൽ വിക്കറ്റ് നേടിയ ബൗളറാണ്. വലിയ കളിക്കാർക്ക് അവരുടെ കഴിവുകളെക്കുറിച്ച് ഓർമ്മപ്പെടുത്തേണ്ടതില്ല. അവർക്ക് എപ്പോഴും മത്സരത്തിൽ നിർണായകമായ മാറ്റങ്ങൾ വരുത്താൻ സാധിക്കും. ശരിയായ ഏരിയകളിൽ ആത്മവിശ്വാസത്തോടെ പന്തെറിയുന്നതാണ് അവരെ മികച്ച പ്രകടനം നടത്താൻ സഹായിക്കുന്നത്,” ജോഷി പറഞ്ഞു.

ടൂർണമെന്റിലെ വിദേശ കളിക്കാരുടെ ഫോമിനെക്കുറിച്ചും ജോഷി സംസാരിച്ചു. എല്ലാ കളിക്കാരും മികച്ച പ്രകടനം നടത്താൻ കഴിവുള്ളവരാണ്. ഒരു നല്ല കളിയിലൂടെ അവർക്ക് ഫോമിലേക്ക് തിരിച്ചുവരാൻ സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. ടീമിൽ മാറ്റങ്ങളുണ്ടാകുമോ എന്ന ചോദ്യത്തിന്, സാഹചര്യങ്ങൾക്കനുരിച്ച് തന്ത്രങ്ങൾ മെനയുമെന്നും എതിരാളികൾക്ക് അനുയോജ്യമായ കളിക്കാരെ തിരഞ്ഞെടുക്കുമെന്നും ജോഷി വ്യക്തമാക്കി.