അഞ്ചര കിലോ കഞ്ചാവുമായി രണ്ട് അന്യ സംസ്ഥാന തൊഴിലാളികൾ പിടിയിൽ

മൂവാറ്റുപുഴ: അഞ്ചര കിലോ കഞ്ചാവുമായി രണ്ട് അന്യ സംസ്ഥാന തൊഴിലാളികൾ പിടിയിൽ. പശ്ചിമ ബംഗാൾ സ്വദേശികളായ ബപ്പറാജ് ഇസ്ലാം (28), മൈമോൻ മണ്ഡൽ (28) എന്നിവരെയാണ് മൂവാറ്റുപുഴ ഇൻസ്പെക്ടർ ബേസിൽ തോമസിന്റെ നേതൃത്വത്തിൽ അറസ്റ്റ് ചെയ്തത്. ഓപ്പറേഷൻ ഡി ഹണ്ടിന്റെ ഭാഗമായി ജില്ലാ പൊലീസ് മേധാവി എം. ഹേമലതയുടെ നിർദ്ദേശപ്രകാരമായിരുന്നു പരിശോധന. തൃക്കളത്തൂർ പള്ളിത്താഴത്ത് നിന്നാണ് ഇവ‌‌ർ വിൽപ്പനയ്ക്കായി കൊണ്ടുവന്ന മൂന്ന് കിലോ കഞ്ചാവ് പിടികൂടിയത്. തുടർന്ന് നടത്തിയ ചോദ്യം ചെയ്യലിൽ മൂവാറ്റുപുഴ ഹോസ്റ്റൽ ജംഗ്ഷൻ ഭാഗത്ത് നിന്ന് ഇവർ സൂക്ഷിച്ചിരുന്ന രണ്ടര കിലോ കഞ്ചാവ് കൂടി പിടികൂടി.

ഡിവൈ.എസ് .പി പി.എം. ബൈജുവിന്റെ കീഴിലുള്ള അന്വേഷണ സംഘത്തിൽ എസ്.ഐമാരായ എസ്.എൻ. സുമിത, കെ.കെ. രാജേഷ്, പി.ബി. സത്യൻ, അസിസ്റ്റന്റ് സബ് ഇൻസ്‌പെക്ടർമാരായ സി.കെ. മീരാൻ, ജമാൽ, സീനിയർ സി.പി.ഒമാരായ ബിബിൽ മോഹൻ, സലീം, കെ.എ. അനസ്, ധനേഷ് ബി. നായർ, സൂരജ് കുമാർ, എം.കെ. ഫൈസൽ, മഹേഷ്‌ കുമാർ, സി.പി.ഒമാരായ സന്ദീപ് ബാബു, കെ.എച്ച്. ഹാരിസ്, രഞ്ജിത് രാജൻ, ജിജു, ഷാൻ എന്നിവർ ഉണ്ടായിരുന്നു.