കുവൈത്തിൽ തെരുവുനായ്ക്കളുടെ ആക്രമണത്തിൽ സൈനിക ക്യാപ്റ്റന് ഗുരുതര പരിക്ക്

കുവൈത്ത് സിറ്റി: കുവൈത്തിലെ സുബ്ഹാനിൽ തെരുവുനായ്ക്കളുടെ ആക്രമണത്തിൽ സൈനിക ക്യാപ്റ്റന് ഗുരുതര പരിക്ക്. എയർ ഫോഴ്സ് ബറ്റാലിയനിൽ നിന്ന് ജോലി കഴിഞ്ഞ് പുറത്തിറങ്ങി ഓഫീസർ തന്‍റെ വാഹനത്തിനടുത്തേക്ക് നടന്ന് പോകുമ്പോൾ പെട്ടെന്ന് നായ്ക്കൾ കൂട്ടമായി ആക്രമിക്കുകയായിരുന്നു. ആക്രമണത്തെ തുടർന്ന് അദ്ദേഹത്തിന് ഗുരുതരമായ മുറിവുകൾ ഉണ്ടായിട്ടുണ്ട്.

ഓഫീസറുടെ സഹപ്രവർത്തകർ കൃത്യ സമയത്ത് ഇടപെട്ടതുകൊണ്ട് അദ്ദേഹത്തെ നായ്ക്കളിൽ നിന്ന് രക്ഷിക്കാൻ കഴിഞ്ഞു. ഉടൻ തന്നെ അദ്ദേഹത്തെ ജാബർ അൽ അഹമ്മദ് ആംഡ് ഫോഴ്സസ് ഹോസ്പിറ്റലിലേക്ക് കൊണ്ടുപോയി.

തെരുവുനായ്ക്കളുടെ ആക്രമണത്തിൽ ഒരു കുട്ടിക്ക് ഗുരുതരമായി പരിക്കേറ്റ് 48 മണിക്കൂറിന് ശേഷമാണ് ഈ സംഭവവും നടക്കുന്നത്. കുട്ടിയ്ക്ക് ഗുരുതരമായ മുറിവുകളേൽക്കുകയും അൽ-അദാൻ ഹോസ്പിറ്റലിലെ തീവ്രപരിചരണ വിഭാഗത്തിൽ പ്രവേശിപ്പിക്കുകയും ചെയ്തു.