തെരുവ് നായ ആക്രമണം രൂക്ഷം; കുവൈത്തില്‍ നടപടികൾ ശക്തമാക്കി

കുവൈത്തില്‍ തെരുവ് നായ ആക്രമണം രൂക്ഷമായതിനെ തുടർന്ന് പബ്ലിക് അതോറിറ്റി ഫോർ അഗ്രികൾച്ചറൽ അഫയേഴ്സ് ആൻഡ് ഫിഷ് റിസോഴ്സസ് ശക്തമായ ഫീൽഡ് ക്യാംപെയ്ൻ ആരംഭിച്ചു. പ്രധാനമായും പാർപ്പിട പ്രദേശങ്ങളിലെ നായ ശല്യമാണ് അധികൃതർ ലക്ഷ്യമിടുന്നത്.

കഴിഞ്ഞ ദിവസം സബ്ഹാനിൽ ജോലി കഴിഞ്ഞ് വാഹനത്തിൽ കയറാൻ ശ്രമിക്കുമ്പോൾ ഒരു സൈനിക ഉദ്യോഗസ്ഥനെ തെരുവുനായ്ക്കൾ ആക്രമിച്ചു പരുക്കേൽപ്പിച്ചിരുന്നു. അദ്ദേഹത്തെ ജാബർ അൽ അഹമദ് ആശുപത്രിയിൽ പ്രവേശിപ്പിച്ചിരിക്കുകയാണ്. ഇതിനുപുറമെ, സമീപ പ്രദേശത്ത് നിന്നുള്ള ഒരു കുട്ടിക്കും തെരുവുനായയുടെ ആക്രമണത്തിൽ പരുക്കേറ്റു. കുട്ടി അദാൻ ആശുപത്രിയിൽ ചികിത്സയിലാണ്.