പേനിന്റെ ശല്യം കാരണം ഉറക്കം നഷ്ടപ്പെട്ടോ? പരിഹാരം വീട്ടിൽ തന്നെ കണ്ടെത്താം…

കുട്ടികൾ മുതൽ മുതിർന്നവരുടെ വരെ ഉറക്കം നഷ്ടപ്പെടുത്തുന്ന ഒരു പ്രശ്നമാണ് പേൻ ശല്യം. കുട്ടികൾ സ്കൂളിൽ പോയി തുടങ്ങിയാൽ പിന്നെ പേനിന്റെ ശല്യവും തുടങ്ങും. ഇത് ഒരാളുടെ തലയിൽ നിന്ന് മറ്റൊരാളിലേക്ക് പെട്ടെന്ന് പകരും. ഏറെക്കുറെ വ്യക്തിശുചിത്വമില്ലായ്മയുടെ ഒരു ലക്ഷണം കൂടിയാണ് തലയിൽ പേൻ ശല്യം ഉണ്ടാവുന്നത്. പേൻ ശല്യം അകറ്റാനായി പല മരുന്നുകളും ഇപ്പോൾ വിപണിയിൽ ലഭ്യമാണ്. എന്നാൽ അത് ഉപയോഗിക്കുന്നത് വഴി മുടിയ്ക്ക് പല കേടുപാടുകളും ഉണ്ടാകാൻ സാധ്യതയുണ്ട്. പേൻ ശല്യം ഒഴിവാക്കാനായി സഹായിക്കുന്ന പ്രകൃതിദത്ത മാർഗങ്ങൾ എന്തൊക്കെയാണെന്ന് നോക്കാം.

ബേബി ഓയിൽ: പേൻ ശല്യം ഒഴിവാക്കാൻ മികച്ച വഴിയാണ് ബേബി ഓയിൽ. ഇതിനായി ബേബി ഓയിൽ തലയിൽ പുരട്ടി ഒരു രാത്രി മുഴുവൻ വയ്ക്കുക . രാവിലെ മുടി നന്നായി ചീകുക. അതിന് ശേഷം ഷാംപൂ ഉപയോഗിച്ച് തല കഴുകുക. ഇതും തുടർച്ചയായി ചെയ്യുന്നത് പേൻ ശല്യം അകറ്റാൻ സഹായിക്കും.

തുളസി: പേന്‍ ശല്യം കുറയാന്‍ ഏറ്റവും മികച്ചതാണ് പരിഹാരമാണ് തുളസി. ഇതിനായി ആഴ്ചയില്‍ രണ്ടോ മൂന്നോ ദിവസം തുളസി അരച്ച് മുടിയില്‍ തേച്ച് പിടിപ്പിച്ച് അല്‍പനേരത്തിനുശേഷം കഴുകിക്കളയുക, പേന്‍ശല്യം നന്നായി കുറയും.

ഒലിവ് ഓയിൽ: തലയിലെ പേന്‍ ഇല്ലാതാക്കാൻ ഒലിവ് ഓയിൽ ഏറെ മികച്ചതാണ്. ഉറങ്ങാൻ പോകുന്നതിനു മുൻപ് തലയോട്ടിയിൽ ഒലിവ് ഓയിൽ പുരട്ടുക. പിറ്റേ ദിവസം രാവിലെ ഷാംപു ഉപയോഗിച്ച് തല കഴുകാം. ഇത് പേനിനെ പൂർണമായും ഇല്ലാതാക്കാൻ സഹായിക്കുന്നു.

ഉള്ളി നീര്: തലയിലെ പേനിനെ അകറ്റാൻ മികച്ച പ്രതിവിധിയാണ് ഉള്ളിനീര്. എല്ലാവര്‍ക്കും സുലഭമായി ലഭിക്കുന്നത് കൊണ്ട് എളുപ്പത്തിൽ ഇതുപയോഗിച്ച് പേനിനെ അകറ്റാം. ഇതിനായി ആഴ്ചയില്‍ ഒന്നോ രണ്ടോ ദിവസം ഉള്ളി നീര് തലയില്‍ തേച്ച് പിടിപ്പിക്കാം. ഇത് പേനിനെ പൂര്‍ണമായും ഇല്ലാതാക്കാന്‍ സഹായിക്കും. ശേഷം ഷാമ്പൂ ഉപയോഗിച്ച് കഴുകാൻ മറക്കരുത്.