ഇനി കത്തുപിടിക്കുമെന്ന പേടി വേണ്ട; ഇവികളുടെ ബാറ്ററിക്കുള്ളിൽ സുരക്ഷാ സാങ്കേതികവിദ്യയുമായി ഹ്യുണ്ടായ്

ഇലക്ട്രിക് വാഹന ബാറ്ററി സുരക്ഷാ സാങ്കേതികവിദ്യ വികസിപ്പിച്ച്‌ ഹ്യുണ്ടായ് മോബിസ്. ഒരു സെല്ലിൽ തീപ്പിടിത്തമുണ്ടായാൽ മറ്റു ബാറ്ററി സെല്ലുകളിലേക്ക് തീ പടരാതിരിക്കാൻ ഈ സാങ്കേതികവിദ്യ സഹായിക്കും. ഇവികളിലെ ബാറ്ററികളിൽ തീപ്പിടിത്തമുണ്ടായാൽ സ്വയം അവ പ്രതിരോധം തീർക്കുന്ന സംവിധാനമാണിത്. താപ പ്രതിരോധ ശേഷിയുള്ള വസ്തുക്കളാണ് ഈ ബാറ്ററി സാങ്കേതികവിദ്യയിൽ ഉപയോഗിച്ചിരിക്കുന്നത്.

ബാറ്ററി കെയ്സിനൊപ്പം ഒരു അഗ്നിശമന ഉപകരണവും സംയോജിപ്പിച്ചിട്ടുണ്ട്. ലോകത്ത് എവിടെയും ഇതുവരെ വാണിജ്യവത്കരിക്കപ്പെട്ടിട്ടില്ലാത്ത ഒരു നൂതന കണ്ടുപിടുത്തമാണിതെന്നാണ് കമ്പനി അവകാശപ്പെടുന്നത്. അതേസമയം, ഹ്യുണ്ടായ് മോബിസ് കഴിഞ്ഞയാഴ്ച അമേരിക്കയിൽ വാർഷിക മൊബിലിറ്റി ടെക് ഷോ നടത്തിയിരുന്നു. വടക്കേ അമേരിക്കൻ വിപണിക്ക് വേണ്ടിയുള്ള കമ്പനിയുടെ കാഴ്ചപ്പാടും നിക്ഷേപ തന്ത്രവുമായിരുന്നു ഷോയുടെ പ്രധാന ലക്ഷ്യം. കമ്പനിയുടെ നാലാമത്തെ മോബിസ് മൊബിലിറ്റി ഡേ ഡിട്രോയിറ്റിലാണ് സംഘടിപ്പിച്ചത്.