തള്ളിയതാണല്ലേ; മുംബൈയുടെ ജയത്തിന് പിന്നാലെ ഇഷാൻ കിഷനെ ട്രോളി ആരാധകർ

ഐപിഎല്ലിൽ ഹൈദരാബാദിനെ തോൽപിച്ചതോടെ ഏഴാം സ്ഥാനത്തേക്ക് ഉയർന്നിരിക്കുകയാണ് മുംബൈ ഇന്ത്യൻസ്. മുംബൈയുടെ ജയത്തിന് പിന്നാലെ അപ്രതീക്ഷിത ട്രോളുകളിൽ പെട്ട് വലയുകയാണ് മുൻ മുംബൈ താരവും ഇപ്പോഴത്തെ ഹൈദരാബാദ് താരവുമായ ഇഷാന്‍ കിഷന്‍.

ഇത്തവണത്തെ താരലേലത്തിൽ മുംബൈ ഇന്ത്യന്‍സ് ഇഷാനെ നിലനിർത്തിയിരുന്നില്ല. ഈ മത്സരത്തിന് മുന്നോടിയായുള്ള അഭിമുഖത്തിൽ മുംബൈയെ നേരിടാന്‍ കാത്തിരിക്കുകയാണെന്നും മുംബൈയുടെ ശക്തമായ ബൗളിങ് നിരക്കെതിരേ വലിയ സ്‌കോര്‍ നേടുകയെന്നത് സ്വപ്‌നമാണെന്നും ഇഷാൻ പറഞ്ഞിരുന്നു. എന്നാൽ കഴിഞ്ഞ മത്സരത്തിൽ താരം നിരാശപ്പെടുത്തിയതോടെയാണ് താരത്തിന് നേരെ ട്രോളുകളുമായി ആരാധകർ എത്തിയിരിക്കുന്നത്.

ആദ്യമത്സരത്തിലെ സെഞ്ച്വറി പ്രകടനത്തിനു ശേഷം പിന്നീടുള്ള മത്സരങ്ങളിലെല്ലാം ഇഷാൻ കിഷൻ നിരാശപ്പെടുത്തുകയായിരുന്നു. മൂന്നാം നമ്പറിലിറങ്ങിയ ഇഷാന് കഴിഞ്ഞ മത്സരത്തിൽ രണ്ട് റണ്‍സ് മാത്രമാണ് നേടാൻ കഴിഞ്ഞത്. വില്‍ ജാക്‌സിന്റെ പന്തില്‍ വിക്കറ്റ് കീപ്പര്‍ റിയാന്‍ റിക്കല്‍റ്റന്‍ സ്റ്റംപ് ചെയ്ത് ഇഷാനെ പുറത്താക്കുകയായിരുന്നു.