സൗദിയിലെ മൂന്നാറിലേക്ക് സഞ്ചാരികളുടെ പ്രവാഹം

അബഹ: നീലപ്പട്ട് പുതച്ച് സൗദിയിലെ തെരുവോരങ്ങൾ. നീലപൂക്കൾ നിറഞ്ഞ ജക്രാന്ത മരങ്ങൾ പൂത്തുലഞ്ഞ് വർണ വിസ്മയം തീർക്കുകയാണ്. സൗദിയിലെ അസീർ മേഖലയിലാണ് പ്രധാനമായും നയനമനോഹരമായ ജക്രാന്ത മരങ്ങൾ പൂത്തുലഞ്ഞ്നിൽക്കുന്നത്. അബഹയിലും മറ്റു ​ഗവർണറേറ്റുകളിലും സമാനമായി ജക്രാന്ത മരങ്ങൾ പൂവിട്ടിട്ടുണ്ട്. തെരുവോരങ്ങളിലും പാർക്കുകളിലും കാഴ്ചയുടെ വിസ്മയം തേടി നിരവധി പേരാണ് എത്തുന്നത്.

അസീർ മേഖലയിൽ ജക്രാന്ത മരങ്ങൾ പൂവിട്ട് നിൽക്കുന്നത് കാണാൻ നിരവധി പേരാണ് ഇവിടെയെത്തുന്നത്. പൂത്തുനിൽക്കുന്ന മരങ്ങളുടെ പശ്ചാത്തലത്തിൽ ചിത്രങ്ങൾ പകർത്താനാണ് പ്രധാനമായും ആളുകൾ എത്തുന്നത്. റസ്റ്റോറന്റുകളും കോഫി ഷോപ്പുകളും ഈ മരങ്ങൾക്ക് കീഴെ ഇരിപ്പിടങ്ങൾ ഒരുക്കി സന്ദർശകരെ ആകർഷിക്കുന്നുണ്ട്. അസീർ മേഖലയിൽ ഏതാണ്ട് 15,000ത്തോളം ജക്രാന്ത മരങ്ങൾ ഉണ്ട്. ഇത് 18 മീറ്ററോളം ഉയരത്തിൽ വളരാറുണ്ട്. ബെ​ഗോണിയോസി കുടുംബത്തിൽപ്പെട്ടവയാണ് ജക്രാന്ത മരങ്ങൾ. മാർച്ച് പകുതി മുതൽ ഇവ പൂത്തു തുടങ്ങും. വിത്തുകളിലൂടെ സ്വാഭാവികമായി പ്രജനനം നടത്തുന്നവയാണ് ഈ മരങ്ങൾ.

ജനങ്ങൾ അധികമായി എത്തുന്ന ആർട്ട് സ്ട്രീറ്റ് മുതൽ അബു ഖയാൽ, ആൻഡലസ് പാർക്കുകളിലെ ഇടങ്ങൾ വരെയും നീലനിറത്തിലുള്ള ജക്രാന്ത പൂക്കൾ കൊണ്ട് നിറഞ്ഞിരിക്കുകയാണ്. സൗദിയിൽ പ്രധാനമായും വിനോദ സഞ്ചാരികൾ എത്തുന്ന ഇടമാണ് അസീർ മേഖല. പൊതുവെ തണുപ്പും മഞ്ഞുമാണ് ഇവിടുത്തെ ഇപ്പോഴത്തെ കാലാവസ്ഥ.

മൂന്നാറിൽ മാർച്ച് സമയങ്ങളിൽ ജക്രാന്ത അല്ലെങ്കിൽ നീല വാകകൾ പൂത്തിരുന്നു. ആ കാഴ്ചകൾ കാണാനും അനുഭവിക്കാനും കഴിയാത്ത സൗദി മലയാളികൾക്ക് അബഹയിൽ പൂത്തുലഞ്ഞ ജക്രാന്ത മരങ്ങൾ ഒരു ആശ്വാസം തന്നെയാണ്. വൈവിധ്യമാർന്ന സസ്യങ്ങൾ അബഹയുടെ പ്രത്യേകതയാണ്. ഇവിടെയിപ്പോൾ നീല പരവതാനി വിരിച്ചിരിക്കുന്ന ഈ ജക്രാന്ത മരങ്ങളാണ് പ്രധാന ആകർഷണം. സ്വദേശികളും വിദേശികളുമടക്കം നിരവധി പേരാണ് ഈ നയന മനോഹരമായ കാഴ്ച ആസ്വദിക്കാനെത്തുന്നത്.