കർമ്മ ന്യൂസ് ഓൺലൈൻ എംഡി വിൻസ് മാത്യു കുടുങ്ങിയത് ഇങ്ങനെ

തിരുവനന്തപുരം: വി​ദ്വേഷ പ്രചാരണം ഉൾപ്പെടെയുള്ള കുറ്റങ്ങൾ ചുമത്തി കർമ്മ ന്യൂസ് ഓൺലൈൻ എംഡിയെ പൊലീസ് അറസ്റ്റ് ചെയ്തു. കർമ്മ ന്യൂസ് ഓൺലൈൻ എംഡി വിൻസ് മാത്യുവിനെയാണ് ഇന്നു രാവിലെ തിരുവനന്തപുരം വിമാനത്താവളത്തിൽ നിന്നും പിടികൂടിയത്. ആസ്ട്രേലിയയിൽ നിന്ന് തിരിച്ചത്തിയ വിൻസ് മാത്യുവിനെ എമി​ഗ്രേഷൻ ഉദ്യോ​ഗസ്ഥർ തടഞ്ഞുവെച്ച് പൊലീസിന് കൈമാറുകയായിരുന്നു.

മൂന്ന് കേസുകളാണ് വിൻസ് മാത്യുവിനെതിരെ നിലവിലുള്ളത്. ഇയാൾക്കെതിരെ സൈബർ പൊലീസ് ലുക്ക് ഔട്ട് നോട്ടീസ് ഇറക്കിയിരുന്നു. കളമശ്ശേരി സ്ഫോടന സമയത്ത് സ്ഫോടനത്തെ പിന്തുണച്ച് ഇയാളുടെ കർമ്മ ന്യൂസിൽ വാർത്ത കൊടുത്തിരുന്നു. ഇതിനെതിരെ നിരവധി പരാതി വന്നിരുന്നു. ഈ കേസിൽ വിൻസിനെതിരെ സൈബർ പൊലീസ് കേസെടുത്തിരുന്നു. മുഖ്യമന്ത്രിയുടെ ദുരിതാശ്വാസനിധിയിൽ തട്ടിപ്പ് നടന്നു എന്നായിരുന്നു മറ്റൊരു വ്യാജ വാർത്ത. ഈ കേസിലാണ് വിൻസിനെതിരെ പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചത്.

ഓസ്ട്രേലിയലിൽ നിന്നും രാവിലെ തിരുവനന്തപുരം വിമാനത്താവളത്തിൽ എത്തിയപ്പോൾ എമി​ഗ്രേഷൻ ഉദ്യോ​ഗസ്ഥർ തടഞ്ഞുവെക്കുകയായിരുന്നു. പിന്നീട് സൈബർ പൊലീസിന് കൈമാറി. കേസിൽ ചോദ്യം ചെയ്തതിന് ശേഷം വിൻസ് മാത്യുവിനെ കോടതിയിൽ ഹാജരാക്കും.