കൂൾ ക്യാപ്റ്റൻ; പാറ്റ് കമ്മിൻസിനെ പുകഴ്ത്തി നിതീഷ് കുമാർ റെഡ്ഡി

പാറ്റ് കമ്മിൻസിനെ പുകഴ്ത്തി സൺ റൈസേഴ്സ് ഹൈദരാബാദിന്റെ യുവതാരം നിതീഷ് കുമാർ റെഡ്ഡി. സമ്മർദഘട്ടങ്ങളെ അതിജീവിക്കാനുള്ള ക്യാപ്റ്റൻ കമ്മിൻസിന്റെ കഴിവിനെയാണ് നിതീഷ് കുമാർ റെഡ്ഡി പുകഴ്ത്തിയിരിക്കുന്നത്.

കഴിഞ്ഞ ഐപിഎല്ലിൽ എസ്ആർഎച്ചിനെ ഫൈനലിലെത്തിച്ച നായകനാണ് കമ്മിൻസ്. ആ സീസണിലെ ഫൈനലിൽ സൺ റൈസേഴ്സ് ഹൈദരാബാദ് കൊൽക്കത്തയോട് തോറ്റിരുന്നു. കഴിഞ്ഞ സീസണിൽ 18 വിക്കറ്റുകൾ നേടിയ കമ്മിൻസ് 143.16 എന്ന സ്ട്രൈക്ക് റേറ്റിൽ 136 റൺസും അടിച്ചെടുക്കുകയുണ്ടായി.

‘കമ്മിൻസ് ശാന്തനും കൂളുമായ ക്യാപ്റ്റനാണ്. ടീമിന് ആത്മവിശ്വാസം കമ്മിൻസ് നൽകുന്നുണ്ട്. അദ്ദേഹം സമ്മർദഘട്ടങ്ങളെ തരണം ചെയ്യുന്നത് അത്ഭുതാവഹമാണ്. അങ്ങനെയൊരാളെ ക്യാപ്റ്റനായി കിട്ടുന്നത് പ്രധാനമാണ്. അദ്ദേഹത്തിന്റെ ഈ രീതി നമ്മൾക്ക് തിരിച്ചുവരാനുള്ള ഊർജം നൽകുന്നതാണ്. ഒരു ക്യാപ്റ്റനെന്ന നിലയിൽ അദ്ദേഹത്തിന് കീഴിൽ കളിക്കുന്നത് ഞാനാസ്വദിക്കുന്നു‘ നിതീഷ് കുമാർ പറഞ്ഞു.