റോയല്‍ ചലഞ്ചേഴ്സിന് തിരിച്ചടി: ഗുജറാത്തിനെതിരായ മത്സരത്തില്‍ വിരാട് കോഹ്ലിക്ക് പരിക്ക്

ബെംഗളൂരു: റോയല്‍ ചലഞ്ചേഴ്സ് ബെംഗളൂരുവിന് തിരിച്ചടി. ഗുജറാത്ത് ടൈറ്റന്‍സിനെതിരായ മത്സരത്തില്‍ തോല്‍വി ഏറ്റുവാങ്ങിയതിന് പിന്നാലെ സൂപ്പര്‍ താരം വിരാട് കോഹ്ലിക്ക് പരിക്ക്. ഡീപ് മിഡ് വിക്കറ്റില്‍ ഫീല്‍ഡ് ചെയ്യുന്നതിനിടെയാണ് സ്റ്റാര്‍ ബാറ്റ്സ്മാന്‍ വിരാട് കോഹ്ലിയുടെ വിരലിന് പരിക്കേല്‍ക്കുന്നത്.

ഗുജറാത്ത് ടൈറ്റന്‍സിന്റെ ചേസിന്റെ 12-ാം ഓവറില്‍ ക്രുണാല്‍ പാണ്ഡ്യയുടെ പന്ത് സായ് സുദര്‍ശന്‍ ബൗണ്ടറിയിലേക്ക് അടിച്ചു. കോഹ്ലി പന്ത് തടയാന്‍ നോക്കിയെങ്കിലും തെന്നി വലത് കൈയിലെ വിരലില്‍ തട്ടി ബൗണ്ടറിയിലേക്ക് ഉരുണ്ടു. കോഹ്ലി ഉടന്‍ തന്നെ മുട്ടുകുത്തി പരിക്കേറ്റ വിരലില്‍ പിടിക്കുകയും ചെയ്തു. ആര്‍സിബിയുടെ മെഡിക്കല്‍ സ്റ്റാഫിന്റെ പരിശോധനയ്ക്ക് ശേഷമാണ് കോഹ്ലി ഫീല്‍ഡില്‍ തുടര്‍ന്നത്. ഫീല്‍ഡില്‍ തുടര്‍ന്നെങ്കിലും താരം അസ്വസ്ഥനായി കാണപ്പെട്ടു. പരിക്കിന്റെ വ്യാപ്തി അറിയില്ലെങ്കിലും ശേഷിക്കുന്ന മത്സരങ്ങളെ ബാധിക്കില്ലെന്നാണ് ആര്‍സിബി ആരാധകര്‍ പ്രതീക്ഷിക്കുന്നത്.