നോമ്പുതുറയ്ക്ക് തയ്യാറാക്കാം രുചികരമായ ബ്രെഡ് റോൾ; ഈ സിമ്പിൾ റെസിപ്പി പരീക്ഷിച്ചു നോക്കൂ

നോമ്പ് തുറയ്ക്ക് വിളമ്പാൻ ഒരു ബ്രെഡ് റോൾ തയ്യാറാക്കിയാലോ. വളരെ കുറച്ച് ചേരുവകളും എളുപ്പത്തിൽ തയ്യാറാക്കാവുന്നതുമായ ഈ വിഭവം കുട്ടികൾക്കും മുതിർന്നവർക്കും ഒരു പോലെ ഇഷ്‌ടപ്പെടും. തയ്യാറാക്കുന്നത് എങ്ങനെയെന്ന് നോക്കാം.

ആവശ്യമായ ചേരുവകൾ

• ബ്രെഡ് – 4 എണ്ണം
• ഉരുളക്കിഴങ്ങ് – 2 എണ്ണം
• ഉള്ളി – 1 എണ്ണം
• സ്വീറ്റ് കോൺ – 4 ടേബിൾ സ്‌പൂൺ
• പയർ – 3 ടേബിൾ സ്‌പൂൺ
• ഇഞ്ചി വെളുത്തുള്ളി പേസ്റ്റ് – 1 ടീസ്‌പൂൺ
• മുളക് പൊടി – 1/2 ടീസ്‌പൂൺ
• പച്ചമുളക് – 1
• മഞ്ഞൾ – 1/4 ടീസ്‌പൂൺ
• ഗരം മസാല – 1/2 ടീസ്‌പൂൺ
• മല്ലിയില – 2 ടേബിൾ സ്‌പൂൺ
• മാങ്ങാ പൊടി – 1/2 ടീസ്‌പൂൺ
• പനീർ – 3 ടേബിൾ സ്‌പൂൺ
• ഓയിൽ – ആവശ്യത്തിന്
• ഉപ്പ് – ആവശ്യത്തിന്

തയ്യാറാക്കുന്ന വിധം

ആദ്യം ഒരു പാൻ ചൂടാക്കി 3 ടീസ്‌പൂൺ എണ്ണ ഒഴിക്കുക. എണ്ണ ചൂടായി വരുമ്പോൾ ചെറുതായി അരിഞ്ഞ ഉള്ളി ചേർത്ത് വഴറ്റുക. ഗോൾഡൻ നിറമാകുമ്പോൾ ഇതിലേക്ക് ഇഞ്ചി വെളുത്തുള്ളി പേസ്റ്റ്, മുളക് പൊടി എന്നിവ ചേർത്ത് ഇളക്കി യോജിപ്പിക്കുക. സ്വീറ്റ് കോൺ, പയർ എന്നിവ കൂടിയിട്ട് വേവിക്കാം. ശേഷം വേവിച്ച് വച്ചിരിക്കുന്ന ഉരുളക്കിഴങ്ങ് നന്നായി ഉടച്ച് ചേർക്കുക. മഞ്ഞൾ പൊടി, ഗരം മസാല, ഉണക്കി പൊടിച്ച മാങ്ങാ പൊടി, ഉപ്പ് എന്നിവ കൂടി ചേർത്ത് നന്നായി ഇളക്കി യോജിപ്പിക്കുക. ഇനി ഇതിലേക്ക് ഗ്രീറ്റ് ചെയ്‌ത ചീസ്, ചെറുതായി അരിഞ്ഞ മല്ലിയില എന്നിവയിട്ട് മിക്‌സ് ചെയ്യാം. ഒരു മിനിട്ടിന് ശേഷം തീ അണച്ച് തണുക്കാനായി മാറ്റിവയ്ക്കാം.

സൈഡ് കട്ട് ചെയ്‌ത ബ്രെഡ് ചെറുതായി നനച്ചതിന് ശേഷം. നേരത്തെ തയ്യാറാക്കി വച്ചിരിക്കുന്ന മിശ്രിതം ഇതിന് മുകളിലേക്ക് വച്ച് കൊടുക്കാം. ഇനി ഇത് റോൾ ചെയ്തെടുക്കുക. ബാക്കി ബ്രെഡുകളും ഇതേ പോലെ ചെയ്തെടുക്കാം. ശേഷം ഒരു പാൻ അടുപ്പിൽ വച്ച് എണ്ണ ഒഴിച്ച് ചൂടാക്കുക. ഇതിലേക്ക് ബ്രെഡ് റോളുകളിട്ട് ഗോൾഡൻ നിറമാകുന്നതു വരെ ഫ്രൈ ചെയ്തെടുക്കാം. സ്വാദിഷ്‌ടമായ ബ്രെഡ് റോൾ തയ്യാർ. ചട്‌ണിയോടൊപ്പം ടോമോട്ടോ സോസിനോടൊപ്പമോ കഴിക്കാം.