മധുരക്കൊതിയ്ക്കു പിന്നിലുള്ള കാരണം എന്തെന്നറിയാമോ?

വയറു നിറച്ച് ഭക്ഷണം കഴിച്ചാലും ചിലർക്ക് തൃപ്തിയാകില്ല. ഭക്ഷണത്തിന് ശേഷം കുറച്ചു മധുരം കൂടി കഴിച്ചാലേ ഒരു സംതൃപ്തി വരൂ അല്ലേ? എന്നാൽ എന്തായിരിക്കും വയറ് നിറഞ്ഞിരുന്നാലും പിന്നെയും ഈ തോന്നലുണ്ടാകാൻ കാരണമെന്ന് നിങ്ങൾ ചിന്തിച്ചിട്ടുണ്ടോ? പഠനങ്ങൾ പറയുന്നത് നമ്മുടെ വയര്‍ നിറഞ്ഞെന്ന സന്ദേശം നല്‍കുന്ന തലച്ചോറിലെ അതേ കോശങ്ങള്‍ തന്നെയാണ്‌ മധുരവും ആവശ്യപ്പെടുന്നതെന്നാണ്.

മാക്‌സ്‌ പ്ലാങ്ക്‌ ഇന്‍സ്റ്റിറ്റ്യൂട്ട്‌ ഫോര്‍ മെറ്റബോളിസം റിസര്‍ച്ചിലെ ഡോ. ഹെന്നിങ്‌ ഫെന്‍സെലോയുടെ നേതൃത്വത്തിലുള്ള ഗവേഷക സംഘമാണ്‌ പഠനം നടത്തിയത്‌. എലികളിലും ആരോഗ്യമുളള 30 മനുഷ്യരിലുമാണ്‌ പഠനം നടത്തിയത്‌. പിഒഎംസി ന്യൂറോണുകളുടെ ഈ ഇരട്ട മുഖമാണ്‌ നമ്മുടെ ഭക്ഷണശേഷമുള്ള മധുരക്കൊതിക്ക്‌ പിന്നിലെന്ന്‌ സയന്‍സ്‌ ജേണലില്‍ പ്രസിദ്ധീകരിച്ച ഇവരുടെ പഠനറിപ്പോര്‍ട്ട്‌ പറയുന്നു.

ഈ മധുരക്കൊതിക്ക്‌ പിന്നില്‍ പരിണാമപരമായ പ്രത്യേകതകളും ഉണ്ടാകാമെന്ന്‌ ഡോ. ഹെന്നിങ്ങ്‌ പറയുന്നു. പ്രകൃതിയില്‍ അപൂര്‍വമായി മനുഷ്യര്‍ക്ക്‌ ലഭിച്ചിരുന്നതും എന്നാല്‍ പെട്ടെന്ന്‌ ഊര്‍ജ്ജം പ്രദാനം ചെയ്‌തിരുന്നതുമായ വിഭവമാണ്‌ മധുരം. അതിനാല്‍ എപ്പോള്‍ കിട്ടിയാലും കഴിക്കാന്‍ തോന്നുന്ന രീതിയിലാണ്‌ തലച്ചോര്‍ മധുരവിഭവങ്ങളെ കണക്കാക്കി വച്ചിരിക്കുന്നത്‌. ഇതാകാം മനുഷ്യരുടെ ഇനിയും മാറാത്ത മധുരത്തോടുള്ള ആസക്തിയുടെ പിന്നിലെന്ന്‌ കരുതപ്പെടുന്നു.