മുക്കം സാമൂഹിക ആരോഗ്യകേന്ദ്രത്തിൽ കണ്ണ് പരിശോധന ഇനി എഐ സഹായത്തോടെ

കോഴിക്കോട് : കാഴ്ച പരിമിതിയിലേക്ക് നയിക്കുന്ന മൂന്ന് രോഗങ്ങളെ തുടക്കത്തിൽ കണ്ടെത്താൻ മുക്കം സാമൂഹികാരോഗ്യകേന്ദ്രത്തിൽ നിർമ്മിതബുദ്ധിയുടെ സഹായത്തോടെയുള്ള കണ്ണ് പരിശോധന ആരംഭിച്ചു.

പ്രമേഹം കാരണം ഉണ്ടാകുന്ന റെറ്റിനോപ്പതി, ഗ്ലോക്കോമ, പ്രായം കൂടുമ്പോൾ ഉണ്ടാകുന്ന മാക്യുലാർഡീജനറേഷൻ എന്നീ രോഗങ്ങൾ നിർമ്മിതബുദ്ധിയുടെ സഹായത്തോടെ കണ്ണ് സ്‌ക്രീൻ ചെയ്ത് കണ്ടെത്തുന്ന പദ്ധതിയാണിത്. കണ്ണ് പരിശോധനയിൽ രോഗസൂചന ലഭിച്ചാൽ രോഗിയെ നേത്രരോഗ വിദഗ്ധന്റെ അടുത്തേക്ക് റഫർചെയ്യും.

നഗരസഭ 2024-25 സാമ്പത്തിക വർഷം ഫണ്ട് വകയിരുത്തി നടപ്പിലാക്കുന്ന പദ്ധതി നഗരസഭ ചെയർമാൻ പി ടി ബാബു ഉദ്ഘാടനം ചെയ്തു. ആരോഗ്യ സ്റ്റാൻ്റിംഗ് കമ്മിറ്റി ചെയർപേഴ്സൻ പ്രജിത പ്രദിപ്, വൈസ് ചെയർപേഴ്സൻ കെ പി ചാന്ദ്നി, ഇ സത്യനാരയണൻ, കൗൺസിലർമാരായ അശ്വതി സനൂജ്, ജോഷില, കെ ബിന്ദു, ടി കെ സാമി, മെഡിക്കൽ ഓഫീസർ ഡോ ശ്രീജ, സൂപ്രണ്ട് കെ ഷിജു തുടങ്ങിയവർ സംസാരിച്ചു.