പാകിസ്ഥാനിലും ഇനി സ്റ്റാര്‍ലിങ്ക് സേവനങ്ങള്‍ ലഭിക്കും; നടപടികൾ തുടങ്ങി

പാകിസ്ഥാനിലും ഇനി സ്റ്റാര്‍ലിങ്ക് സേവനങ്ങള്‍ ലഭിക്കും. സാറ്റ്ലൈറ്റ് ഇന്റര്‍നെറ്റ് നല്‍കുന്ന ഇലോണ്‍ മസ്‌കിന്റെ കമ്പനിക്ക് പാക്കിസ്ഥാന്‍ സര്‍ക്കാര്‍ താല്‍ക്കാലിക എന്‍ഒസി നല്‍കി. പ്രധാനമന്ത്രി ഷഹബാസ് ഷെരീഫിന്റെ നിര്‍ദ്ദേശപ്രകാരം സ്റ്റാര്‍ലിങ്കിന് താല്‍ക്കാലിക രജിസ്‌ട്രേഷന്‍ നല്‍കിയതായി പാകിസ്ഥാന്‍ ഐടി മന്ത്രി ഷാജ ഫാത്തിമ പറഞ്ഞു. ഇതോടെ പാകിസ്ഥാനില്‍ സ്റ്റാര്‍ലിങ്ക് സേവനങ്ങള്‍ ആരംഭിക്കുന്നതിനുള്ള വഴി തുറന്നു.

എല്ലാ സുരക്ഷാ, നിയന്ത്രണ ഏജന്‍സികളുടെയും സമ്മതത്തിന് ശേഷം സ്റ്റാര്‍ലിങ്കിന് പാകിസ്ഥാനില്‍ താല്‍ക്കാലിക എന്‍ഒസി നല്‍കിയിട്ടുണ്ടെന്ന് ഷാജ ഫാത്തിമ പറഞ്ഞു. ഇതോടെ പാകിസ്ഥാനില്‍ സാറ്റ്ലൈറ്റ് ഇന്റര്‍നെറ്റ് സേവനങ്ങള്‍ ഔപചാരികമായി ആരംഭിക്കും. രാജ്യത്തെ ഇന്റര്‍നെറ്റ് സേവനങ്ങളും ഐടി അടിസ്ഥാന സൗകര്യങ്ങളും മെച്ചപ്പെടുത്തുന്നതിനുള്ള ഒരു വലിയ ചുവടുവയ്പ്പാണിതെന്ന് മന്ത്രി പറഞ്ഞു. കഴിഞ്ഞ വര്‍ഷം പാകിസ്ഥാനില്‍ സേവനം ആരംഭിക്കുന്നതിന് സ്റ്റാര്‍ലിങ്ക് അപേക്ഷിച്ചിരുന്നു.

കുറച്ച് ദിവസങ്ങള്‍ക്ക് മുമ്പ് പുറത്തുവന്ന ഒരു റിപ്പോര്‍ട്ട്, പാകിസ്ഥാനില്‍ സ്റ്റാര്‍ലിങ്കിന്റെ പദ്ധതിയുടെ സാധ്യമായ വിലയെക്കുറിച്ച് വെളിപ്പെടുത്തിയിരുന്നു. ഇതനുസരിച്ച്, ഗാര്‍ഹിക ഉപയോഗത്തിനുള്ള സ്റ്റാര്‍ലിങ്ക് പ്ലാനിന്റെ വില പ്രതിമാസം 6,800 മുതല്‍ 28,000 വരെ പാകിസ്ഥാന്‍ രൂപയാകാന്‍ സാധ്യതയുണ്ട്. ഇതില്‍, ഉപയോക്താക്കള്‍ക്ക് 50-250 Mbps വേഗത ലഭിക്കും. ഇതിനുപുറമെ, സ്റ്റാര്‍ലിങ്ക് സേവനം ലഭിക്കുന്നതിന് ആവശ്യമായ ഹാര്‍ഡ്വെയറിന്റെ വില 97,000 പാകിസ്ഥാന്‍ രൂപ ആകാം. ഇന്ത്യന്‍ കറന്‍സിയില്‍ ഇത് ഏകദേശം 30,000 രൂപ വരെ വരും.