പാചകത്തിലും രുചിക്കും മാത്രമല്ല, ഉപ്പിന് വേറെയും ചില ഉപയോഗങ്ങൾ ഉണ്ട് കേട്ടോ

അടുക്കളയിൽ വേണ്ട ഏറ്റവും അത്യാവശ്യ ഘടകമാണല്ലോ ഉപ്പ്. നാം പാചകം ചെയ്യുന്ന മിക്കവാറും എല്ലാ വിഭവങ്ങളിലും ചേർക്കുന്ന അടിസ്ഥാനപരമായ ചേരുവയും ഉപ്പാണ്. എന്നാൽ പാചകത്തിന് പുറമെ ഉപ്പുകൊണ്ട് വേറെയും ചില ഗുണങ്ങളുണ്ട്. ഉപ്പിന്റെ ചില അവിശ്വസനീയമായ ഉപയോഗങ്ങളെക്കുറിച്ചും അവ നമുക്ക് എങ്ങനെ ഉപകാരപ്രദമാകും എന്നതിനെക്കുറിച്ചും ഒന്ന് നോക്കിയാലോ?

1. തുണികളിലെ കറ കളയാൻ

വസ്ത്രത്തിൽ ഉള്ള വിയർപ്പിന്റെ കറ, ഇങ്ക്, ചായക്കറ, എണ്ണക്കറ എന്നിവ നീക്കം ചെയ്യാൻ ഉപ്പ് കൊണ്ട് സാധിക്കും. ഉപ്പിട്ട് ഉരച്ച് കഴുകിയാൽ എളുപ്പത്തിൽ ഏത് കറയും ഇല്ലാതാകുന്നതാണ്.

2. ഈർപ്പത്തെ ഇല്ലാതാക്കുന്നു

ഉപ്പിന് ഈർപ്പത്തെ വലിച്ചെടുക്കാൻ സാധിക്കും. നിലത്തിടുന്ന ചവിട്ടുമെത്ത, കാർപെറ്റ് തുടങ്ങിയവയിൽ ഉണ്ടായിരിക്കുന്ന ഈർപ്പത്തെ കളയാൻ ഉപ്പ് ഉപയോഗിക്കാവുന്നതാണ്.

3. പൈപ്പിൽ അടിഞ്ഞുകൂടിയ മാലിന്യം

പൈപ്പിൽ അടിഞ്ഞുകൂടിയ മാലിന്യങ്ങളും എണ്ണക്കറയുമൊക്കെ ഉപ്പ് ഉപയോഗിച്ച് എളുപ്പത്തിൽ നീക്കം ചെയ്യാൻ സാധിക്കും. കുറച്ച് ഉപ്പ് സിങ്കിലേക്ക് ഇട്ടുകൊടുത്താൽ മാത്രം മതി.

4. ഭക്ഷണങ്ങളുടെ ഗന്ധം

സവാള, വെളുത്തുള്ളി എന്നിവ മുറിക്കുമ്പോൾ കൈകളിൽ അതിന്റെ ഗന്ധമുണ്ടാകാറുണ്ട്. എത്ര സോപ്പ് ഉപയോഗിച്ച് കഴുകിയാലും ഇത് പോകണമെന്നില്ല. അത്തരം സാഹചര്യങ്ങളിൽ ഉപ്പിട്ട വെള്ളത്തിൽ കൈകൾ മുക്കിവെച്ചാൽ മതിയാകും.

5. ഷൂവിലെ ദുർഗന്ധം

മഴയത്ത് ഷൂവിട്ടുപോകുമ്പോൾ നനയാനും അതുമൂലം ദുർഗന്ധമുണ്ടാവുകയും ചെയ്യുന്നു. ഉപ്പ് ഈർപ്പത്തെ വലിച്ചെടുക്കുന്നത് കൊണ്ട് തന്നെ ഇത് ഉപയോഗിച്ച് ഷൂവിലെ ദുർഗന്ധം അകറ്റാൻ സാധിക്കും.

6. പ്രാണികളെ ഇല്ലാതാക്കാം

വീട്ടിൽ ഉറുമ്പ് ശല്യമുണ്ടെങ്കിൽ ഉപ്പ് ഉപയോഗിച്ച് പരിഹാരം കാണാൻ സാധിക്കും. തറ തുടയ്ക്കുമ്പോൾ വെള്ളത്തിൽ കുറച്ച് ഉപ്പ് ചേർത്ത് വൃത്തിയാക്കാവുന്നതാണ്.