എംഡിഎംഎയുമായി മൂന്നുപേർ പിടിയിൽ

വിൽപ്പനയ്ക്കായി കൊണ്ടുവന്ന എംഡിഎംഎയുമായി മൂന്നുപേർ മാറനല്ലൂർ പോലീസിന്റെ പിടിയിലായി. പെരുമ്പഴുതൂർ ചെമ്മണ്ണുവിള കിഴക്കുംകര പുത്തൻവീട്ടിൽ അജിൻലാൽ(23), മാറനല്ലൂർ ആയുർവേദ ആശുപത്രിക്കുസമീപം മലവിള വീട്ടിൽ ലാൽകൃഷ്ണ(27), പെരുമ്പഴുതൂർ വടകോട് മഠവിളാകത്ത് വീട്ടിൽ ശ്രീകാന്ത്(19) എന്നിവരാണ് പിടിയിലായത്. മൂന്നുപേരും ഒന്നിച്ച് സ്കൂട്ടറിൽ കറങ്ങി വിൽപ്പന നടത്തുന്നതാണ് രീതി.

പോലീസിനു ലഭിച്ച രഹസ്യവിവരത്തിന്റെ അടിസ്ഥാനത്തിൽ മാറനല്ലൂരിൽ പ്രത്യേക സ്ഥലങ്ങൾ കേന്ദ്രീകരിച്ചു നടത്തിയ അന്വേഷണത്തിലാണ് പ്രതികൾ പിടിയിലാകുന്നത്. ലാൽകൃഷ്ണ നിരവധി ക്രിമിനൽക്കേസിലെ പ്രതിയും സ്റ്റേഷൻ റൗഡി ലിസ്റ്റിൽപ്പെട്ടയാളുമാണ്. നഗരത്തിൽ നിന്നാണ് ഇവർ സാധനം വാങ്ങുന്നതെന്ന് പോലീസ് പറഞ്ഞു. ഇവരിൽനിന്ന് രണ്ട് ഗ്രാം എംഡിഎംഎ കണ്ടെടുത്തിട്ടുണ്ട്. ഇവർ സഞ്ചരിച്ച സ്‌കൂട്ടറും കസ്റ്റഡിയിലെടുത്തിട്ടുണ്ട്. മൂന്നുപേരേയും കോടതിയിൽ ഹാജരാക്കി.