വിപണിയില്‍ മികച്ച തുടക്കം; ഐഫോണ്‍ 16ഇ ചൈനയിൽ മുന്നേറുന്നു

ആപ്പിളിന്റെ എൻട്രി ലെവല്‍ സ്മാർട്ട്‌ഫോണായ ഐഫോണ്‍ 16 ഇ (iPhone 16e) ചൈനീസ് വിപണിയില്‍ മികച്ച തുടക്കം കുറിച്ചതായി റിപ്പോർട്ട്.ഷവോമി, വിവോ, ഹുവാവേ തുടങ്ങിയ ശക്തരായ ആഭ്യന്തര ബ്രാൻഡുകള്‍ വാഴുന്ന ചൈനയില്‍ ആപ്പിളിന് ഈ മുന്നേറ്റം വലിയ ആശ്വാസം നല്‍കുന്നു.

സാമ്ബത്തികപരമായ വെല്ലുവിളികള്‍ക്കിടയിലും പുതിയ മോഡലിൻ്റെ മികച്ച പ്രകടനം വിപണിയില്‍ ശ്രദ്ധേയമാവുകയാണ്.
പുറത്തുവന്ന റിപ്പോർട്ടുകള്‍ പ്രകാരം, ഐഫോണ്‍ 16 ഇ ചൈനയില്‍ അതിൻ്റെ മുൻഗാമി മോഡലായ ഐഫോണ്‍ എസ്‌ഇ (iPhone SE) യെക്കാള്‍ 60 ശതമാനം അധികം വില്‍പ്പന നേടിയിട്ടുണ്ട്. ഇൻ്റർനാഷണല്‍ ഡാറ്റാ കോർപ്പറേഷൻ (IDC) പുറത്തുവിട്ട കണക്കുകള്‍ ഈ മുന്നേറ്റം വ്യക്തമാക്കുന്നു. എന്നിരുന്നാലും, ഈ മികച്ച പ്രകടനം കഴിഞ്ഞ വർഷത്തെ മൊത്തത്തിലുള്ള വില്‍പ്പനയിലെ കുറവ് നികത്താൻ പര്യാപ്തമാകുമോ എന്ന് കണ്ടറിയണം. ഈ വർഷം മൊത്തത്തില്‍ രണ്ട് ശതമാനം വില്‍പ്പന കുറവുണ്ടാകുമെന്നാണ് ഐഡിസിയുടെ വിലയിരുത്തല്‍.

ആൻഡ്രോയിഡ് വെല്ലുവിളിയും സർക്കാർ പിന്തുണയും
ചൈനീസ് വിപണിയില്‍ ആൻഡ്രോയിഡ് ഫോണുകള്‍ ശക്തമായ വെല്ലുവിളിയാണ് ഉയർത്തുന്നത്. ഇതിനോടൊപ്പം, ചൈനീസ് സർക്കാരിൻ്റെ ദേശീയ സബ്‌സിഡികള്‍ ആഭ്യന്തര ആൻഡ്രോയിഡ് ബ്രാൻഡുകള്‍ക്ക് കൂടുതല്‍ ഗുണം ചെയ്യും. ഇത് ആപ്പിളിന് വലിയ വെല്ലുവിളിയാകുമെന്ന് ഐഡിസി സീനിയർ ഡയറക്ടർ നബില പോപാല്‍ അഭിപ്രായപ്പെട്ടു. ആൻഡ്രോയിഡ് ഫോണുകളുടെ വൈവിധ്യമാർന്ന ഫീച്ചറുകളും കുറഞ്ഞ വിലയും ഉപഭോക്താക്കളെ ആകർഷിക്കുന്നുണ്ട്. ഈ സാഹചര്യത്തില്‍ ഐഫോണ്‍ 16 ഇയുടെ മുന്നേറ്റം ശ്രദ്ധേയമാണ്.

കഴിഞ്ഞ ഉത്സവ സീസണില്‍ ഐഫോണ്‍ വില്‍പ്പനയില്‍ 11 ശതമാനം കുറവുണ്ടായെങ്കിലും, കമ്ബനി സാവധാനം വിപണിയില്‍ തങ്ങളുടെ സ്ഥാനം വീണ്ടെടുക്കുകയാണ്. വിലയെക്കുറിച്ച്‌ കൂടുതല്‍ ശ്രദ്ധിക്കുന്ന ഇന്ത്യ പോലുള്ള വിപണികളിലും ആപ്പിള്‍ ഉല്‍പ്പന്നങ്ങളുടെ വില്‍പ്പനയില്‍ വർദ്ധനവ് പ്രതീക്ഷിക്കുന്നുണ്ട്.

ഐഫോണ്‍ എസ്‌ഇ-യുടെ പുതിയ അവതാരം

ഐഫോണ്‍ 16 ഇ എന്നത് മുൻപ് ആപ്പിളിൻ്റെ ഏറ്റവും വിലകുറഞ്ഞ മോഡലായിരുന്ന മൂന്നാം തലമുറ ഐഫോണ്‍ എസ്‌ഇക്ക് പകരമായി എത്തിയ പുതിയ ഫോണാണ്. ഈ മോഡലിന് ഇന്ത്യയില്‍ 59,900 രൂപയാണ് വില. ഇത് മുൻ മോഡലിനെക്കാള്‍ അല്പം കൂടുതലാണ്. ഈ വിലയില്‍, മികച്ച ഫീച്ചറുകളും സവിശേഷതകളുമുള്ള നിരവധി ആൻഡ്രോയിഡ് ഫോണുകള്‍ വിപണിയില്‍ ലഭ്യമാണ്. എന്നിരുന്നാലും, ആപ്പിളിൻ്റെ ബ്രാൻഡ് മൂല്യവും ഐ ഒ എസിൻ്റെ സുഗമമായ പ്രവർത്തനവും ഐഫോണ്‍ 16 ഇയെ ആകർഷകമാക്കുന്നു.

മറ്റ് ഐഫോണ്‍ 16 മോഡലുകളില്‍ ഉപയോഗിച്ചിരിക്കുന്ന ഏറ്റവും പുതിയ എ18 ചിപ്പാണ് ഇതിന് നല്‍കിയിരിക്കുന്നത്. എന്നാല്‍ ഇതിന് കുറഞ്ഞ ജിപിയു കോറുകളും 8ജിബി റാമും ഉണ്ട്. ആപ്പിള്‍ ഇന്റലിജൻസ് (Apple Intelligence) പിന്തുണയ്ക്കുന്ന ഏറ്റവും വിലകുറഞ്ഞ ഐഫോണ്‍ എന്ന പ്രത്യേകതയും ഇതിനുണ്ട്. മുൻ മോഡലായ ഐഫോണ്‍ എസ്‌ഇയുമായി താരതമ്യപ്പെടുത്തുമ്ബോള്‍, ഐഫോണ്‍ 16 ഇ-ക്ക് വലുതും കൂടുതല്‍ ആധുനികവുമായ ഡിസ്‌പ്ലേ, യുഎസ്ബി സി പോർട്ട്, ആക്ഷൻ ബട്ടണ്‍, 48 മെഗാപിക്സല്‍ പ്രധാന ക്യാമറ എന്നിവ ഉള്‍പ്പെടുന്നു.