അശ്രദ്ധയോ കൊലപാതകമോ? മറഡോണയുടെ മരണത്തിൽ പുറത്ത് വരുന്ന വിവരങ്ങൾ ഞെട്ടിക്കുന്നത്

ഫുട്‍ബോൾ ഇതിഹാസം ഡീഗോ മറഡോണ ലോകത്തോട് വിടപറഞ്ഞത് 2020 നവംബറിലാണ്. അക്യൂട്ട് പൾമണറി എഡിമയും വിട്ടുമാറാത്ത ഹൃദയസ്തംഭനവുമാണ് മരണകാരണമെന്ന് ഔദ്യോഗികമായി റിപ്പോർട്ട് ചെയ്യപ്പെട്ടിരുന്നു. എന്നാൽ അവസാന നാളുകളിലെ അദ്ദേഹത്തിന്‍റെ ചുറ്റുപാടുകൾ അസ്വസ്ഥത ഉളവാക്കുന്ന കാര്യങ്ങളാണ് വരച്ചുകാട്ടുന്നത്. ചികിത്സാ പിഴവുകൾ, ഉത്തരം ലഭിക്കാത്ത ചോദ്യങ്ങൾ, എന്നിവയോടൊപ്പം ഇതൊരു കൊലപാതകമാണോ എന്ന് വരെ നീണ്ടിനിൽക്കുന്ന ചോദ്യങ്ങളിലേക്കാണ് മറഡോണയുടെ മരണം എത്തിനിൽക്കുന്നത്. ഫുട്‍ബോൾ കൊണ്ട് ലോകത്തെ ഞെട്ടിച്ച സൂപ്പർതാരത്തിന് ഇത്തരത്തിലൊരു അവസാനം എങ്ങനെ ലഭിച്ചെന്ന് അറിയാതിരിക്കുകയാണ് ലോകം. മറഡോണയെ ചികിത്സിച്ച ഏഴംഗ വൈദ്യസംഘത്തെ വിചാരണ ചെയ്യുമെന്ന് നേരത്തെ അറിയിച്ചിരുന്നു.

മരണത്തിന് ഏതാനും ആഴ്ചകൾക്ക് മുമ്പ് മറഡോണയ്ക്ക് സബ്ഡ്യൂറൽ ഹെമറ്റോമയ്ക്ക് ശസ്ത്രക്രിയ നടത്തിയിരുന്നു. അദ്ദേഹത്തിന് ദുർബലാവസ്ഥ ഉണ്ടായിരുന്നിട്ടും, 24 മണിക്കൂറും വൈദ്യ മേൽനോട്ടം ലഭിക്കുന്ന ഒരു ആശുപത്രിയിൽ സൂക്ഷിക്കുന്നതിനുപകരം അദ്ദേഹത്തെ വീട്ടിൽ തന്നെ പരിചരണത്തിലാക്കി. പിന്നീട് ഒരു മെഡിക്കൽ ബോർഡിൽ നിന്നുള്ള റിപ്പോർട്ടിൽ മറഡോണയുടെ പരിചരണം “കുറവും അശ്രദ്ധയും” ആണെന്ന് നിഗമനം ചെയ്യുന്നുണ്ട്, അദ്ദേഹത്തിന്റെ ക്ഷേമത്തിന് ഉത്തരവാദികളായവർ എടുത്ത തീരുമാനങ്ങളെക്കുറിച്ച് ഗുരുതരമായ ആശങ്കകൾ ഈ റിപ്പോർട്ട് ഉയർത്തുന്നു.

മറഡോണയുടെ അവസാന നാളുകൾ ഒരു “ഭയാനകമായ വീടിനുള്ളിൽ” പോലെ ആയിരുന്നുവെന്ന് മുഖ്യ പ്രോസിക്യൂട്ടർ പട്രീഷ്യോ ഫെരാരി വിശേഷിപ്പിച്ചു. ശരിയായ വൈദ്യസഹായം ലഭിക്കാതെ അദ്ദേഹം 12 മണിക്കൂറിലധികം വേദന അനുഭവിച്ചതായി റിപ്പോർട്ടുണ്ട്. അദ്ദേഹത്തിന്റെ ജീവൻ നഷ്ടപ്പെടാൻ കാരണമായേക്കാവുന്ന കാര്യമാണിത്.

മനഃപൂർവമല്ലാത്ത നരഹത്യയ്ക്ക് ഏഴ് മെഡിക്കൽ പ്രൊഫഷണലുകൾ നിലവിൽ വിചാരണ നേരിടുന്നുണ്ട്, കുറ്റക്കാരാണെന്ന് കണ്ടെത്തിയാൽ 8 മുതൽ 25 വർഷം വരെ തടവ് ശിക്ഷ ലഭിക്കാൻ സാധ്യതയുണ്ട്. ന്യൂറോസർജൻ ലിയോപോൾഡോ ലൂക്ക്, സൈക്യാട്രിസ്റ്റ് അഗസ്റ്റിന കൊസാച്ചോവ്, മനഃശാസ്ത്രജ്ഞൻ കാർലോസ് ഡയസ്, മെഡിക്കൽ ക്ലിനിഷ്യൻ പെഡ്രോ ഡി സ്പഗ്ന, ഹോം കെയർ കോർഡിനേറ്റർ നാൻസി ഫോർലിനി, നഴ്സിംഗ് കോർഡിനേറ്റർ മരിയാനോ പെറോണി, നഴ്‌സ് റിക്കാർഡോ അൽമിറോൺ എന്നിവരാണ് പ്രതിചേർക്കപ്പെട്ടവർ.

നിർണായകമായ മുന്നറിയിപ്പ് സൂചനകൾ അവഗണിച്ചുവെന്ന് മാത്രമല്ല, മറഡോണയുടെ മരണം അനിവാര്യമാക്കുന്ന സാഹചര്യങ്ങൾക്ക് വഴിയൊരുക്കാനും ഈ ടീമിന്‍റെ സംഭാവനയുണ്ടെന്ന് പ്രോസിക്യൂട്ടർമാർ വാദിക്കുന്നു.