ബ്രിഗേഡ് പരേഡ് ഗ്രൗണ്ടിനെ വീണ്ടും ചുവപ്പിക്കാന്‍ ഡിവൈഎഫ്‌ഐ; പതിനായിരങ്ങളെത്തുമെന്ന് നേതൃത്വം

ഞായറാഴ്ചത്തെ ‘ഇന്‍സാഫ് ബ്രിഗേഡ്’ പരിപാടിയിലേക്ക് രാവിലെ മുതല്‍ തന്നെ ഡിവൈഎഫ്‌ഐ, സിപിഐഎം പ്രവര്‍ത്തകര്‍ എത്തിതുടങ്ങി. പതിനായിരങ്ങള്‍ സമ്മേളനത്തിനെത്തുമെന്നാണ് ഡിവൈഎഫ്‌ഐ പ്രതീക്ഷിക്കുന്നത്. തൃണമൂല്‍ കോണ്‍ഗ്രസിനെതിരെയും ബിജെപിയ്‌ക്കെതിരെയും തങ്ങള്‍ ഉയര്‍ത്തുന്ന രാഷ്ട്രീയത്തിന് ഈ പരിപാടിയോടെ വലിയ സ്വീകാര്യത ലഭിക്കുമെന്നാണ് നേതാക്കള്‍ പ്രതീക്ഷിക്കുന്നത്.

‘അവര്‍ (സംഘ്പരിവാര്‍ സംഘടനകള്‍) 100,000 പേരെ പങ്കെടുപ്പിക്കുമെന്നാണ് പറഞ്ഞിരുന്നത്. പക്ഷേ അത് 10,000-15,000ല്‍ ഒതുങ്ങി. ഞങ്ങളുടെ പരിപാടിയില്‍ പങ്കെടുക്കാനെത്തുന്ന ആളുകളെ കൊണ്ട് ഈ മൈതാനം നിറയും. ബ്രിഗേഡ് പരേഡ് ഗ്രൗണ്ടില്‍ നടക്കുന്ന ഏറ്റവും നല്ല ഇടതുറാലിയായിരിക്കും ഇന്നത്തേത്.’ എന്നാണ് ഡിവൈഎഫ്‌ഐ മുഖമാസിക യുവശക്തിയുടെ എഡിറ്റര്‍ കലാധന്‍ ദാസ്ഗുപ്ത പറയുന്നത്.

2021ലെ നിയമസഭ തിരഞ്ഞെടുപ്പിന് ശേഷം സംഘടനയിലേക്ക് യുവാക്കളെ കൊണ്ടുവരാന്‍ സംസ്ഥാനത്തെ സിപിഐഎം തീരുമാനിച്ചിരുന്നു. ഇതിനെ തുടര്‍ന്ന് നിരവധി മാറ്റങ്ങളാണ് ബംഗാൾ സിപിഐഎമ്മില്‍ നടന്നത്. ലോക്‌സഭ തിരഞ്ഞെടുപ്പിന്റെ ഒരുക്കമെന്നോണം ബ്രിഗേഡ് പരേഡ് ഗ്രൗണ്ടില്‍ റാലി നടത്താനും ഡിവൈഎഫ്‌ഐയെയാണ് സിപിഐഎം ഏല്‍പ്പിച്ചത്.

50 ദിവസം നീണ്ടുനിന്ന കാല്‍നടയാത്രയുടെ സമാപന ചടങ്ങായാണ് ബ്രിഗേഡ് പരേഡ് ഗ്രൗണ്ടിലെ പരിപാടി. നവംബര്‍ മൂന്നിന് കൂച്ചബിഹാറില്‍ നിന്ന് ആരംഭിച്ച യാത്ര ഡിസംബര്‍ 22ന് കൊല്‍ക്കത്തയിലാണ് സമാപിച്ചത്. 22 ജില്ലകളിലായി 2,200 കിലോമീറ്ററാണ് യാത്ര പിന്നിട്ടത്.