ഐ‌പി‌എല്ലിലേക്ക് താരങ്ങളെ അയക്കുന്നത് നിർത്തണം; വിദേശരാജ്യങ്ങൾ ഇന്ത്യയോട് പകരം വീട്ടണമെന്ന് മുൻ പാക് താരം

ഐ‌പി‌എല്ലിലേക്ക് താരങ്ങളെ അയയ്ക്കുന്നത് മറ്റ് രാജ്യങ്ങൾ നിർത്തണമെന്ന് മുൻ പാക് ക്യാപ്റ്റൻ ഇൻസമാം ഉൾ ഹഖ് പറഞ്ഞു. വിദേശ ടി20 ലീഗുകൾക്കായി ബി‌സി‌സി‌ഐ അവരുടെ കളിക്കാരെ വിട്ടയച്ചില്ലെങ്കിൽ മറ്റ് രാജ്യങ്ങൾ ഇന്ത്യൻ മണ്ണിലെ ലീഗിലേക്ക് അവരുടെ ക്രിക്കറ്റ് കളിക്കാരെ വിട്ടയക്കുന്നത് നിർത്തണമെന്നാണ് അദ്ദേഹം പറഞ്ഞത്.

‘ചാമ്പ്യൻസ് ട്രോഫി മാറ്റിവെക്കൂ, ലോകമെമ്പാടുമുള്ള എല്ലാ മികച്ച കളിക്കാരും പങ്കെടുക്കുന്ന ഐ‌പി‌എൽ നോക്കൂ. എന്നാൽ ഇന്ത്യൻ കളിക്കാർ മറ്റ് ലീഗുകളിൽ കളിക്കാൻ പോകുന്നില്ല. അതിനാൽ, എല്ലാ ബോർഡുകളും അവരുടെ കളിക്കാരെ ഐ‌പി‌എല്ലിലേക്ക് അയയ്ക്കുന്നത് നിർത്തണം‘, ഇൻസമാം ഉൾ ഹഖ് പറഞ്ഞു.

ഒരു ഇന്ത്യൻ ക്രിക്കറ്റ് കളിക്കാരന് വിദേശ ലീഗുകളിൽ കളിക്കാൻ അനുവാദമുള്ളത് ഇന്ത്യൻ ക്രിക്കറ്റിൽ നിന്ന് വിരമിച്ചതിന് ശേഷമാണ്. യുവരാജ് സിംഗ്, ഇർഫാൻ പത്താൻ തുടങ്ങി താരങ്ങളും GT20 കാനഡ, ലങ്ക പ്രീമിയർ ലീഗ് തുടങ്ങിയ ടൂർണമെന്റുകളിലും പങ്കെടുത്തിട്ടുണ്ടെങ്കിലും അതും ഇന്ത്യൻ ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചതിന് ശേഷമായിരുന്നു.