കാമുകിയെ ക്രൂരമായി കൊലപ്പെടുത്തി

ചെന്നൈ: രണ്ട് പെൺസുഹൃത്തുക്കളുടെ സഹായത്തോടെ 22 വയസുകാരനായ യുവാവ് തന്റെ കാമുകിയെ ക്രൂരമായി കൊലപ്പെടുത്തി. ഡേറ്റിങ് ആപ്പ് വഴി പരിചയപ്പെട്ട താവിയ സുൽത്താന (22), ആർ.മോനിഷ (21) എന്നീ സുഹൃത്തുക്കളുടെ സഹായത്തോടെയാണ് യുവാവ് കാമുകിയെ കൊലപ്പെടുത്തിയത്. തിരുച്ചിറപ്പള്ളി സ്വദേശി ലോകനായകി (35) ആണ്‌ കൊല്ലപ്പെട്ടത്. സംഭവത്തിൽ യുവതിയുടെ കാമുകനായ അബ്ദുൽ അസീസിനെയും കൂട്ടാളികളെയും പോലീസ് അറസ്റ്റ് ചെയ്തു.

എന്‍ജിനീയറിങ് വിദ്യാർഥിയായ അബ്ദുൽ അസീസ് സോഷ്യൽ മീഡിയയിലൂടെയാണ് വർഷങ്ങൾക്ക് മുൻപ് ലോകനായകിയെ പരിചയപ്പെട്ടത്. പിന്നീട് ഇരുവരും പ്രണയത്തിലാവുകയായിരുന്നു. യുവാവ് വിവാഹം ചെയ്യാമെന്ന് വാഗ്‌ദാനം നൽകിയതോടെ അത് വിശ്വസിച്ച് ലോകനായകി മതം മാറുകയും ചെയ്തു. എന്നാൽ, തിങ്കളാഴ്ച രാത്രി ലോകനായകിയെ യേർക്കാടേക്ക് വിളിച്ചു വരുത്തി യുവാവും പെൺസുഹൃത്തുക്കളും കൊലപ്പെടുത്തുകയായിരുന്നു. യുവാവിന്റെ സുഹൃത്തായ നഴ്സിംഗ് വിദ്യാർഥിനി മോനിഷ ലോക നായകിയുടെ ശരീരത്തിൽ വിഷം കുത്തിവെച്ചു. ശേഷം മൂവരും ചേര്‍ന്ന് മൃതദേഹം കൊക്കയിൽ തള്ളുകയായിരുന്നു. ഐടി കമ്പനി ജീവനക്കാരി ആണ്‌ പ്രതിയായ സുൽത്താന. പ്രതികളെ കൊലപാതകത്തിലേക്ക് നയിച്ച കാരണമുൾപ്പെടെ പോലീസ് അന്വേഷിച്ചു വരികയാണ്.