ജില്ലകളിൽ ലഹരി വിരുദ്ധ കർമ്മ സേനകൾ രൂപീകരിക്കും ; കേരള മദ്യവിരുദ്ധ ഏകോപന സമിതി

കൊച്ചി : കേരളത്തിലെ മദ്യ – ലഹരി വിരുദ്ധ പ്രസ്ഥാനങ്ങളുടെ സംസ്ഥാന തല കൂട്ടായ്മയായ കേരള മദ്യവിരുദ്ധ ഏകോപന സമിതിയുടെ നേതൃത്വത്തിൽ എല്ലാ ജില്ലകളിലും “ലഹരിവിരുദ്ധ കർമ്മ സേനകൾ ” രൂപീകരിക്കാൻ തീരുമാനിച്ചു.

വർദ്ധിച്ചുവരുന്ന മയക്കുമരുന്ന് വ്യാപനത്തിനും അക്രമങ്ങൾക്കും എതിരെ ബോധവത്ക്കരണം,ചെറുത്ത് നിൽപ്പ് ,വിവരം നല്കൽ , ചികിത്സാ സഹായം, കൗൺസലിംഗ്, പുനരധിവാസം എന്നീ തലങ്ങളിൽ സംഘടിതമായ പ്രവർത്തനങ്ങളിലൂടെ മുന്നോട്ടുപോകാൻ സമിതി നേതൃത്വം നൽകും.

സമൂഹത്തിലെ വിവിധ സാമൂഹിക- സാംസ്കാരിക – രാഷ്ട്രീയ-മത പ്രസ്ഥാനങ്ങളോടൊപ്പം ചേർന്ന് ലഹരിവിരുദ്ധ പ്രവർത്തനങ്ങൾക്ക് കേരള മദ്യവിരുദ്ധ ഏകോപനസമിതി കർമ്മപദ്ധതികൾ തയ്യാറാക്കും.രാഷ്ട്രീയ പ്രസ്ഥാനങ്ങളും മത സാമൂഹിക സാംസ്കാരിക പ്രസ്ഥാനങ്ങളും ലഹരി വിരുദ്ധ പ്രവർത്തനം അവരുടെ മുഖ്യ അജണ്ടജയായി മാറ്റണമെന്ന് സമിതി ആവശ്യപ്പെട്ടു. ബോധവൽക്കരണം മാത്രമല്ല നിരോധിക്കപ്പെട്ട ലഹരിയുടെ വ്യാപനം തടയാൻ സർക്കാരിൻ്റെ ക്രിയാത്മകമായ ഇടപെടൽ വേണമെന്ന് സമിതി പറഞ്ഞു.

ലഹരിക്ക് അടിമകളായി മാറിയവരെ ചികിത്സിക്കാനുള്ള സംവിധാനങ്ങളും കൗൺസിലിംഗ് കേന്ദ്രങ്ങളിലും സർക്കാർ ഉടൻ ആരംഭിക്കണം .ഐക്യരാഷ്ട്രസഭയുടെ ലഹരി നിർമ്മാർജ്ജന മാർഗ്ഗനിർദ്ദേശങ്ങൾ അനുസരിച്ച് ഡിമാൻഡ് കുറയ്ക്കുവാൻ ബോധവൽക്കരണവും റിസ്‌ക്ക് കുറയ്ക്കുവാൻ ചികിത്സയും സപ്ലൈ കുറയ്ക്കുവാൻ കർശന നടപടികളും നടപ്പിലാക്കണം .സന്തോഷത്തിന്റെ വഴികൾ തേടിയാണ് കുട്ടികൾ ലഹരിക്ക് പിന്നാലെ പോകുന്നത്.

ചെറുപ്പം മുതൽ സ്പോർട്സിലും മറ്റു വിനോദങ്ങളിലും ഏർപ്പെടാനുള്ള അവസരങ്ങളും സാഹചര്യങ്ങളും ഒരുക്കിക്കൊടുത്തും താഴ്ന്ന ക്ലാസുകളിൽ മുതൽ ലഹരിക്കെതിരെ പാഠങ്ങൾ പകർന്നു നല്കിയും ലഹരി വിരുദ്ധ മനോഭാവം കുട്ടികളിൽ ജനിപ്പിക്കണം. മാതാപിതാക്കൾ മാത്രമല്ല അധ്യാപകരും മത-സാമൂഹ്യ- സാംസ്കാരിക -രാഷ്ട്രീയ- പ്രസ്ഥാനങ്ങളും ലഹരി ക്കെതിരായ പോരാട്ടത്തിൽ ഒന്നിച്ച് അണിചേരേണ്ടതുണ്ട്. ഒറ്റക്കെട്ടായി പരിശ്രമത്തിലൂടെ മാത്രമേ ലഹരിയുടെ നീരാളി പിടുത്തത്തിൽ നിന്നും ഈ സമൂഹത്തെ രക്ഷിക്കാൻ സാധിക്കു.

കൊച്ചിയിൽ ചേർന്ന കേരള മദ്യവിരുദ്ധ ഏകോപന സമിതി സംസ്ഥാന നേതൃയോഗം സംസ്ഥാന ചെയർമാൻ ജസ്റ്റീസ് പി.കെ .ഷംസുദ്ദീൻ ഉദ്ഘാടനം ചെയ്തു .സംസ്ഥാന ജനറൽ സെക്രട്ടറി അഡ്വ. ചാർളി പോൾ അധ്യക്ഷനായിരുന്നു . പി. എച്ച് ഷാജഹാൻ,കുരുവിള മാത്യൂസ്, ഷൈബി പാപ്പച്ചൻ, ടി.എം വർഗ്ഗീസ്,ജയിംസ് കോറമ്പേൽ, ജോൺസൺ പാട്ടത്തിൽ, ഹിൽട്ടൺ ചാൾസ്, കെ.കെ.വാമലോചനൻ, രാധാകൃഷ്ണൻ കടവുങ്കൽ, ഏലൂർ ഗോപിനാഥ്, എം എൽ ജോസഫ്, കെ.വി. ജോണി, ജെസി ഷാജി,തുടങ്ങിയവർ പ്രസംഗിച്ചു. ലഹരിക്കെതിരെ തയ്യാറാക്കിയ “അമൂല്യം ജീവിതം; അരുത് ലഹരി ” എന്ന ഗ്രന്ഥം സൗജന്യമായി വിതരണം ചെയ്യുവാനും ലഹരിക്കെതിരെ 12 മണിക്കൂർ അഖണ്ഡബോധവത്ക്കരണ യഞ്ജം നടത്തുവാനും നേതൃയോഗം തീരുമാനിച്ചു.