നിർത്തിയിട്ടിരുന്ന ട്രക്കിന് പിന്നിൽ ബസ് ഇടിച്ച് കയറി അപകടം

ആഗ്ര: നിർത്തിയിട്ടിരുന്ന ട്രക്കിന് പിന്നിലേക്ക് ബസ് ഇടിച്ച് കയറി അപകടം. നാല് പേർ മരിക്കുകയും 19 പേർക്ക് പരിക്കേൽക്കുകയും ചെയ്തു. ആഗ്ര – ലക്നൗ എക്സ്പ്രസ് വേയിൽ ഇന്ന് രാവിലെയാണ് അപകടമുണ്ടായത്. വരാണസിയിൽ നിന്ന് ജയ്പൂരിലേക്ക് പോകുകയായിരുന്ന ബസ് എക്സ്പ്രസ് വേയ്ക്ക് സമീപം നിർത്തിയിട്ടിരുന്ന ട്രക്കിലേക്ക് ഇടിച്ച് കയറുകയായിരുന്നു.

അതിരാവിലെ 5.30ഓടെയാണ് അപകടമുണ്ടായത്. ആഗ്രയിലെ ഫത്തേഹാബാദ് പൊലീസ് സ്റ്റേഷൻ പരിധിയിലാണ് സംഭവം. മൃതദേഹങ്ങൾ പോസ്റ്റുമോർട്ടം നടപടിക്കായി അയച്ചുവെന്നും. മരിച്ചവരിൽ ഒരാളെ കൂടി തിരിച്ചറിയാനുണ്ടെന്നും ഫത്തേഹാബാദ് എസിപി അമർദീപ് ലാൽ പറഞ്ഞു. പരിക്കേറ്റവരെ ഉടൻ തന്നെ ആശുപത്രിയിലേക്ക് മാറ്റിയിട്ടുണ്ട്. രാജസ്ഥാൻ സ്വദേശികളായ ഗോവിന്ദ് (68), രമേശ് (45) എന്നിവരും ആഗ്ര സ്വദേശിയായ ദീപക് വർമ (40) എന്നയാളുമാണ് മരിച്ചത്. ഒരാളെ കൂടി തിരിച്ചറിയാനുണ്ട്. അപകടത്തിൽ പരിക്കേറ്റവരിൽ നാല് പേരെ സമീപത്തെ ഒരു സ്വകാര്യ ആശുപത്രിയിലും മറ്റുള്ളവരെ സർക്കാർ ആശുപത്രിയിലും പ്രവേശിപ്പിച്ചു.