ഇന്ത്യയ്ക്ക് ശേഷം മികച്ച രണ്ടാമത്തെ ടീം അഫ്ഗാൻ :മുന്‍ പാക് വനിതാ താരം

അഫ്ഗാനിസ്ഥാന്‍ ക്രിക്കറ്റ് ടീമിനെ പുകഴ്ത്തി പാകിസ്ഥാൻ മുന്‍ വനിതാ താരമായ ഉറൂജ് മുംതാസ്. ഏഷ്യ ഭൂഖണ്ഡത്തില്‍ ഇന്ത്യയ്ക്ക് ശേഷം മികച്ച രണ്ടാമത്തെ ടീം അഫ്ഗാനെന്നാണ് മുംതാസ് അവകാശപ്പെടുന്നത്. ചാമ്പ്യൻസ് ട്രോഫിയില്‍ മികച്ച പ്രകടനമാണ് അഫ്ഗാന്‍ ക്രിക്കറ്റ് ടീം കാഴ്ച വെക്കുന്നത്.

‘ഇന്ത്യയ്ക്ക് ശേഷം ഏഷ്യയില്‍ നിലവിലെ രണ്ടാമത്തെ മികച്ച ക്രിക്കറ്റ് ടീം അഫ്ഗാനിസ്ഥാനാണെന്ന കാര്യത്തില്‍ യാതൊരു സംശയവുമില്ല. നിലവാരത്തില്‍ അഫ്ഗാനിസ്ഥാന്‍ മറ്റു ടീമുകളെ അപേക്ഷിച്ച് വളരെ മുന്നിലാണ്. ബംഗ്ലാദേശ്, ശ്രീലങ്ക, പാകിസ്ഥാൻ എന്നീ ടീമുകളെ നോക്കിയാല്‍ അഫ്ഗാന്‍ വളരെയധികം പുരോഗമിച്ചുവെന്നും ക്രിക്കറ്റിനെ സമീപിക്കുന്ന മനോഭാവത്തിലും അവര്‍ വളരെ മുന്നിലാണെന്നും എനിക്ക് തോന്നിയിട്ടുണ്ട്’, മുംതാസ് പറഞ്ഞു. അവര്‍ക്ക് ശരിക്കും മികച്ച താരങ്ങളുണ്ട്. റാഷിദ് ഖാന്‍ മാത്രമല്ല, മറ്റുചില മാച്ച് വിന്നര്‍മാരുമുണ്ട്. ഇത് ടീമിന്റെ വളര്‍ച്ചയെയാണ് സൂചിപ്പിക്കുന്നത്. കോച്ച് ജോനാഥന്‍ ട്രോട്ടിനും താരങ്ങള്‍ക്കും അഭിനന്ദനങ്ങള്‍. ലോകവേദിയില്‍ അഫ്ഗാന്‍ ടീം യഥാര്‍ത്ഥ പോരാളികളാണ്‘, മുംതാസ് കൂട്ടിച്ചേര്‍ത്തു.