ആലപ്പുഴയിൽ നിന്ന് കുംഭമേളക്ക് പോയ ആളെ കാണാനില്ല; പരാതിയുമായി കുടുംബം

ആലപ്പുഴ: ആലപ്പുഴയിൽ നിന്ന് കുംഭമേളക്ക് പോയ ആളെ കാണാനില്ലെന്ന് പരാതിയുമായി കുടുംബം. ആലപ്പുഴ ചെങ്ങന്നൂര്‍ കൊഴുവല്ലൂര്‍ സ്വദേശി ജോജു ജോര്‍ജി(43)നെയാണ്‌ കാണാതായത്. ജോജു ജോര്‍ജിന്റെ മകളുടെ പരാതിയില്‍ ചെങ്ങന്നൂര്‍ പൊലീസ് കേസെടുത്തു.

ഫെബ്രുവരി ഒൻപതിന് സുഹൃത്ത് ഷിജുവിനൊപ്പം ട്രെയിന്‍ മാര്‍ഗ്ഗമാണ് ജോജു പ്രയാഗ്‌രാജിലേക്ക് പോയത്. ഫെബ്രുവരി 12-ന് ജോജു ജോര്‍ജ്ജ് സുഹൃത്തിന്റെ ഫോണില്‍ നിന്ന്തങ്ങളുമായി ബന്ധപ്പെട്ടുവെന്നാണ് കുടുംബം പറയുന്നത്. മൊബൈല്‍ ഫോണ്‍ തറയില്‍ വീണ് പൊട്ടിയെന്നും വിളിച്ചാല്‍ കിട്ടില്ലെന്നും അറിയിച്ചു.

എന്നാൽ കൂടെ പോയ സുഹൃത്ത് 14-ന് തിരികെ എത്തുകയും ജോജു ജോര്‍ജ്ജ് എവിടെയെന്ന് ചോദിച്ചപ്പോള്‍ പ്രയാഗ്‌രാജില്‍വച്ച് തന്നെ കാണാതായി എന്നാണ് പറഞ്ഞത്. കാണാതായപ്പോള്‍ അവിടുത്തെ പോലീസില്‍ എന്തുകൊണ്ട് സുഹൃത്ത് പരാതി നല്‍കിയില്ലെന്നു കുടുംബം ചോദിക്കുന്നു.