കാട്ടുപന്നികളെ പിടികൂടാൻ വെച്ച കെണിയിൽ കുടുങ്ങിയ പുലി ചത്തു

ബെം​ഗ​ളൂ​രു: കാട്ടുപന്നികളെ പിടിക്കാനായി വെച്ച കെണിക്കുള്ളിൽ കുടുങ്ങിയ പുള്ളിപ്പുലി ചത്തു. കെണിയിലകപ്പെട്ട പുലിക്ക് ഗുരുതരമായി പരിക്കേറ്റിരുന്നു. ചി​ക്ക​മ​ഗ​ളൂ​രു മു​ദി​ഗ​രെ ബാ​ലൂ​രി​ന​ടു​ത്തു​ള്ള കാ​പ്പി​ത്തോ​ട്ട​ത്തി​ൽ കാട്ടുപന്നികളെ പിടികൂടാൻ കെണി വെച്ചിരുന്നു ഈ കെണിക്കുള്ളിലാണ് പുലി അകപ്പെട്ടത്. വിവരമറിഞ്ഞ് സ്ഥലത്തെത്തിയ മു​ദി​ഗ​രെ വ​നം​വ​കു​പ്പ് ഉ​ദ്യോ​ഗ​സ്ഥ​ർ കെണിയിൽ നിന്ന് പുലിയെ മോചിപ്പിച്ച ശേഷം മയക്കി സുരക്ഷിത ഇടത്തിലേക്ക് മാറ്റിയിരുന്നു. പരിക്കേറ്റ പുലിയെ ചി​കി​ത്സി​ക്കാ​ൻ ശി​വ​മൊ​ഗ്ഗ​യി​ൽ​ നിന്നും വെ​റ്റ​റി​ന​റി ഡോക്ടർ എ​ത്തി​യെ​ങ്കി​ലും ചി​കി​ത്സ​യോ​ട് ക്രി​യാ​ത്മ​ക​മാ​യി പുലി പ്രതികരിക്കുന്നില്ലായിരുന്നു. തുടർന്നാണ് പുലിയുടെ മരണം സ്ഥിരീകരിച്ചത്.

എന്നാൽ, പ്രദേശത്ത് പന്നിയെ പിടികൂടാനായി കെണിയൊരുക്കിയ വേട്ടക്കാർ സ്ഥലത്ത് നിന്ന് രക്ഷപെട്ടതായാണ് ലഭ്യമാകുന്ന വിവരം. ഇവർക്ക് വേണ്ടിയുള്ള തിരച്ചിൽ വനം വകുപ്പ് തുടരുന്നുണ്ട്. പ്രദേശത്ത് അനധികൃതമായി വേട്ട നടത്തുന്നത് തടയാനായി പട്രോളിങ്ങും കാര്യക്ഷമമാക്കിയിട്ടുണ്ട്.