പാലത്തിന് മുകളിൽ ട്രെയിൻ എത്തിയപ്പോൾ യുവാവ് പുഴയിലേക്ക് എടുത്ത് ചാടി, ഒടുവിൽ അവശനിലയിൽ നീന്തിക്കയറി

കോഴിക്കോട്: പ്രവാസി യുവാവ് നാട്ടിലേക്കുള്ള ട്രെയിൻ യാത്രാമദ്ധ്യേ പുഴയിൽ ചാടി. കാസർകോട് സ്വദേശി മുനവർ ആണ് കോയമ്പത്തൂർ മാംഗ്‌ളൂർ ഇന്റർസിറ്റി എക്സ്പ്രസിൽ യാത്ര ചെയ്യുന്നതിനിടെ വടകര മൂരാട് പുഴയിലേക്ക് ചാടിയത്. പ്രവാസി മലയാളി പുഴയിലേക്ക് ചാടാനുണ്ടായ കാരണം വ്യക്തമല്ല.

വടകര മൂരാട് റെയിൽവേ മേൽപ്പാലത്തിൽ ട്രെയിനെത്തിയപ്പോഴായിരുന്നു സംഭവം. മറ്റ് സുരക്ഷകളൊന്നുമില്ലാതെയാണ് ഇയാൾ പൊടുന്നനെ എടുത്ത് ചാടിയത്. പിന്നീട് പുഴയിൽ നിന്നും നീന്തി അവശ നിലയിൽ കരക്കെത്തുകയായിരുന്നു. നീന്തി കയറിയ യുവാവിനെ സ്ഥലത്തെത്തിയ പൊലീസ് വടകര ജില്ലാ ആശുപത്രിയിലേക്ക് കൊണ്ടുപോയി. പുഴയിലേക്ക് എടുത്ത് ചാടിയതിൽ യുവാവിന് മറ്റ് ശാരീരിക കുഴപ്പങ്ങളൊന്നും ഉണ്ടായില്ല. ഇയാളുടെ ആരോഗ്യനില തൃപ്തികരമെന്നാണ് വിവരം. വിദേശത്ത് നിന്ന് കോയമ്പത്തൂരിൽ വിമാനമിറങ്ങിയ യുവാവ് ട്രെയിനിൽ കാസർകോടേക്ക് പോവുകയായിരുന്നു.