സെയ്ഫ് അലി ഖാന് കുത്തേറ്റ സംഭവം; പ്രതി 14 ദിവസത്തെ ജുഡീഷ്യല്‍ കസ്റ്റഡിയില്‍

മുംബൈ: ബോളിവുഡ് താരം സെയ്ഫ് അലി ഖാന് കുത്തേറ്റ സംഭവത്തില്‍ പ്രതി ഷരീഫുളിനെ 14 ദിവസത്തെ ജുഡിഷ്യല്‍ കസ്റ്റഡിയില്‍ വിട്ടു. കൂടുതൽ തെളിവുകൾ ഹാജരാക്കുന്ന പക്ഷം ബി.എന്‍.എസ് നിയമം അനുസരിച്ച് കസ്റ്റഡി കാലാവധി നീട്ടി നല്‍കുന്ന കാര്യം പരിഗണിക്കാമെന്നും മജിസ്‌ട്രേറ്റ് അറിയിച്ചു.

അന്വേഷണ സംഘം കൊല്‍ക്കത്തയിലാണെന്നും കസ്റ്റഡി കലാവധി രണ്ട് ദിവസം നീട്ടി നല്‍കണമെന്നും അന്വേഷണ ഉദ്യോഗസ്ഥന്‍ ആവശ്യപ്പെട്ടെങ്കിലും ഇത് കോടതി അനുവദിച്ചില്ല. തെളിവ് ശേഖരണവും അന്വേഷണവും ഏകദേശം പൂര്‍ത്തിയായായതിനാൽ കസ്റ്റഡി കാലാവധി നീട്ടേണ്ട കാര്യമില്ലെന്നും മജിസ്‌ട്രേറ്റ് ചൂണ്ടിക്കാട്ടി.

പ്രതിക്കെതിരെ ആവശ്യത്തിന് തെളിവുകളുണ്ടെന്ന് എ.സി.പി പരംജിത് സിങ് ദഹിയ കഴിഞ്ഞ ദിവസം പറഞ്ഞിരുന്നു. സെയ്ഫ് അലി ഖാന്റെ വീട്ടിൽ നിന്ന് ലഭ്യമായ 19 വിരലടയാളങ്ങളിൽ ഒന്ന് പോലും ഷരീഫുള്‍ ഇസ്ലാമിന്റേതുമായി യോജിക്കുന്നില്ല എന്ന റിപ്പോർട്ട് പുറത്ത് വന്നിരുന്നു ഇത് ചൂണ്ടിക്കാട്ടിയപ്പോഴായിരുന്നു എ.സി.പിയുടെ പ്രതികരണം.